БЕОҐРАД – На схадзки Совиту за национални меншини, хтора вовторок, 3. новембра отримана у Влади Сербиї, предсидатель Вивершного одбору Националного совиту (НС) Руснацох Желько Ковач винєсол же Руснацом представя проблем нове законске предписанє по хторим за снованє ґрупи за виборну наставу мацеринского язика потребни найменєй 5 школяре, та прето нє можеме формовац ґрупи у Новим Садзе.
Тот проблем потримали и представителє других НС-ох, а на схадзки им гварене же Министерство просвити розпатри винєшени проблем и пошвидко на ньго одвитує, гварел Ковач.
Ковач на схадзки Совиту за национални меншини на уровню держави визначел и проблем нєприменьованя Закона о националних совитох и Закона о основох системи образованя и воспитаня у пракси, на конкретним прикладзе у кулскей општини.
– Гварел сом же Скупштина општини Кула до Школского одбору керестуркей Школи „Петро Кузмяк” меновала других, а нє членох котри, як то по законских предписаньох, у мено локалней самоуправи тераз предклада Национални совит Руснацох. Представителє Министерства зазначели тоту заувагу и вимагали же би ше им ю послало и писмено, зоз хронолоґию поступку кандидованя и вибору, цо НС Руснацох и пороби того тижня – гварел Желько Ковач.
Вязано за образованє, додал же на схадзки винєшене и же Министерство просвити тераз розрабя модел финансованя просвитних сотруднїкох за наставу на язикох меншинох, цо тиж була єдна з вимогох Координациї НС-ох.
На основи скорейшей поради, по схадзки Совиту за национални меншини Желько Ковач и чолнїки националних совитох Чарногорцох и Українцох, у Беоґрадзе нащивели и Канцеларию Защитнїка гражданох Сербиї, дзе одвитовали на питаня хтори омбудсман окончує у шицких НС-ох, а похасную за творенє звиту о рочней роботи Защитнїка.