ВУКОВАР – У Вуковаре, у Горватскей, после павзи од 24 роки знова почало виучованє руского язика и култури, дознава Рутенпрес од учительох Илони Грецешин и Наталиї Гнатко. Попри родичох, инициятор обновйованя виучованя руского язика у тим городзе були Дружтво „Руснак” з Петровцох и Рада рускей националней меншини Городу Вуковар.
З дзецми у ОШ „Антон Бауер” роби учителька Илона Грецешин, котра з нагоди нєдавного означованя Медзинародного дня мацеринского язика, 26. фебруара з дзешецерима дзецми, поприберанима до руского народного облєчива, у Вуковаре пририхтала Перши „Вечар рускей поезиї”.
„Вечар рускей поезиї” бул пошвецени руским поетом Меланиї Паповей и Звонимирови Барнови з Вуковару, котри 2014. року обявели заєднїцку збирку поезиї „Дом у шерцу”. Авторе присуствовлаи и на програми, на хторей школяре читали їх стихи, а шпивали и руски народни шпиванки.
Папова и Барна подзековали школяром и учительки на програми и пожадали же би бешедовали руски язик и нїґда го нє забули.
На „Вечаре рускей поезиї” у ОШ „Антон Бауер” присуствовали и директор домашнєй школи Йоза Михалєв, предсидателька Ради рускей националней меншини Городу Вуковар Лела Дїтко, предсидатель Дружтва „Руснак” Мийо Шайтош, учителька руского язика и култури Наталия Гнатко з Петровцох, родичи школярох, як и Руснаци з Вуковару.
З тей нагоди наглашене наздаванє же ше число школярох котри буду виучовац руски язик и културу у Вуковаре будзе звекшовац.