Илузиї театра у театре

автор опс/фото:вев
1.7k Опатрене

У Руским културним центре у Новим Садзе, всоботу, 16. априла, отримана премиєра представи „Божеска ноц” Миру Ґаврана, у режиї и адаптациї Звонимира Павловича.

Кед ше шветла погашели и публика вошла до театра у котрим ше чуло гласну музику „rock an, rolla  AC DC”, а зложену и вецейнїсту приповедку, хтора на символични способ бешедовала и о нєшкайшим чаше, упечатлїво одґлумел пейцчлени,  ґлумецки ансамбл. Живот часто випатра як театер, а людзе у нїм вельораз и ґлумци, парафразуєм Шекспирову думку.

DSC_0259Млади, новосадски, убавени ґлумецки ансамбл у одличним темпу виприповедал интересантну приповедку о театре у театру, о ґлумцох у театру, о людзох на власци и тих блїзких при власци. Найупечатлївше було видзиц як ше власц одноши ґу поєдинцови и поєдинєц ґу власци.

Шицко ше збува у чаше Краля-Слунка, французкого монарха Луя 14, котри пожадал дакус скоштовац зоз тривиялного живота, та ше дружи зоз познатим писательом Молиєром и дворским Дурнїлом. Зоз позициї власци и моци розришую ше шицки проблеми, а доокола лєца глави и судьби у швидким одлучованю геверного и безроботного, єдного єдиного чловека, по дзеки французкого монарха, краля хтори и слунко, як єгипетски фараонє, дзе мера шицких стварох у глави єдного поєдинца, у кральовей глави.

Представа почина цалком реално, дзе ше тройо, на перши попатрунок приятелє, у геверованю зишли означиц дзешату рочнїцу заєднїцкого опиваня по койдзеяких скритих дзирискох. Острасцени и осамени абсолут, Луй 14, славни французки писатель Молиєр, котри муши мерковац на кажде словечко цо напише и вигвари, же би нє превредзел найчувствительнєйшому уху у держави и Дурнїло котри ше прави же є шалєни, та каждому шме повесц тото цо дума до оч, пию, шмею ше и од допитосци бавя кошарку.

У цалком поремеценей гиєрархиї у котрей власц вирошнє по страсц и постава спокуса найгорша од шицких, илузиї помали скапу и почина „представа у представи”, а нєобовязне друженє, прерошнє до бруталного розраховйованя краля зоз писательом, бо ше дознало же Молиєр и Дурнїло покрадзме бавя по Паризу якишик фалат и вишмеюю його велїчество пред публику, пред явносцу хтора нєприятельски розположена. Кед шицки маски попадаю, останє лєм  дилема кого и як „наградзиц” за поступки и хто будзе тот котри одроби брудни роботи за краля…

23 DSC_0463У представи интересантна надреална сцена хтора ше добре  инкорпоровала у приповедки о театре, дзе паризка ґлумица и єй служнїца бешедую и рушаю ше як роботи, ошвицени зоз специялним шветлом, а тота животна приповедка у представи представя цалком реални швет, швет звонка театру. Публика тото дозна аж кед ґлумица, одбиє кральовски дарунок и пре любов ше забиє. Док учела свою нову улогу сцигло и пояшнєнє же вона нє куртизана, алє ґлумица… Хтошка тоти два поняца помишал и живот рушел у траґичним напряме…

Епоха Луя 14 високо естетизована, та можебуц у представи хибели даяки деталї зоз того периоду, алє лєм у естетичним смислу. За добру представу досц и лєм єден єдини карсцель, гваря, а у тей представи, з моцу илузиї, яку ма лєм театер, шанк ше претворел и до чамца, и до посцелї, и до коня… А, конєц представи бул ище єдна илузия театра, бо ше пред очми публики отворела музична шкатула, а фиґура бабки повторйовала рухи у такту музики…

У представи ґлумели Борис Фейди, Славко Бучко, Иґор Горняк, Любица Фечо и Александра Живкович. За дизайн звука задлужени бул Мирослав Пап, за дизайн шветла Ириней Гудак. Костими обдумала Вукица Павлович, сценоґрафию Боґданка Сопка, а асистент режиї бул Ненад Илич, док продуцент була Наташа Макаї Мудрох. Суфлер була Марина Хома, сцена и реквизити Неманя Павлович, орґанизатор Томислав Горняк, авдио ефекти Ненад Илич, а видео Nesha @ Tibor.

DSC_0369

ПОВЯЗАНИ ТЕКСТИ