Новинарска асоцияция Руснацох – НАР у наиходзацих мешацох будзе реализовац два проєкти, та поволує колеґох, членох НАР-у же би ше уключели до роботох на орґанизованю проєктох и рихтаню медийних прилогох. Явна поволанка членох орґанизацийнох и медийних тимох, з конкретнима задлуженями будзе у руских медийох обявена по 10. авґуст.
Покраїнски секретарият за медзиреґионалне сотруднїцтво и локалну самоуправу финансує проєкт НАР-у, авторкох Єлени Перкович и Анамариї Пап Ранкович „Приклади добрей пракси – драгоказ розуменя“.
За тот проєкт Секретарият по контракту да 138.000 динари, предвидзене правенє медийних радио прилогох и промоция прикладох добрей пракси сотруднїцтва локалних самоуправох зоз Европску унию. Часц активносцох будзе финансовац Орґанизация за технїчну потримовку орґанизацийом цивилного дружтва ТАКСО.
На конкурсу Покраїнского секретарияту за културу и явне информованє АП Войводини – За софинансованє проєктох за унапредзенє професийних стандардох явного информованя за 2015. рок, Новинарскей асоцияциї Руснацох – НАР одобрени проєкт Професийного усовершованя руских новинарох и редакторох, авторки Мартици Тамаш.
Професийне усовершованє облапи три сесиї, ношаца тема: Информованє о кризнох ситуацийох, а предвидзени и теми специфични за информованє на язикох националних меншинох та и на руским язику. За тот проєкт Секретарият по контракту да 185.000 динари.
Новинарска асоцияция Руснацох – НАР у 2013. и 2014. року успишно реализовала проєкти фахового усовершованя руских новинарох и редакторох, зоз хторима у 2013. облапени 35, а у 2014. року 38 новинаре и редакторе. Партнер НАР-у на тих проєкт Национални совит рускей националней меншини.
У 2015. року НАР конкуровал ище зоз єдним проєктом и то при Министерству култури и информованя Републики Сербиї, алє нє достал потримовку за його реализацию.