На беоґрадским сайме представени руски кнїжки

автор и. сабадош, фото в. вуячич
592 Опатрене

БЕОҐРАД – На 64. Медзинародним сайме кнїжкох у Беоґрадзе вчера представени кнїжки на руским язику хтори медзи двома манифестациями обявели НВУ „Руске слово” и Завод за културу войводянских Руснацох.

На промоциї у сали „Борислав Пекич” Беоґрадского сайма „Руске слово” представело свойо найновши виданя – вибрани огляди и портрети „Руснаци” (том II) Дюру Латяка и Зборнїк литератури младих 2010-2020 „Гумно 2; Дзеци з дружтвених мрежох”, як и три нови кнїжочки за дзеци и о дзецох – писнї за дзеци Ирини Гарди Ковачевич „За главки у лавки”; писнї и приповедки за дзеци Силвестера Д. Макая „Боси по праху” и поуки за дзеци и старших Юлияна Тамаша „Їжик голик”.

Од насловох хтори обявени скорей през рок и после лоньского Сайму, на промоциї було слова о кнїжки поезиї Славка Романа Ронду „Одняти од псох”; збирки драмох Звонимира Павловича „Зазбероваче труплох” и кнїжка интервюох Олени Планчак Сакач „Вецей од бешеди”.

О шицких насловох на промоциї чий модератор бул редактор видавательней дїялносци НВУ „Руске слово” Микола Шанта бешедовали авторе – Латяк, Ирина Гарди Ковачевич, Тамаш, Макаї и Олена Планчак Сакач, редакторка МАК-у Рената Джуджар представела „Гумно 2”, а публициста Мирон Джуня публики приблїжел авторох и творчосц хтора звонка главного цеку литератури по руски, як цо Павлович, Рондо и ґенерация дакедишнїх и нєшкайших Гумнашох.

Директор НВУ „Руске слово” Борис Варґа окреме визначел же тогорочна видавательна продукция Установи, рижнородна и по жанру и по обсягу, резултат координованей роботи шицких секторох нашей медийней хижи, и ефикасного сотруднїцтва з вонкашнїма партнерами, як цо насампредз Завод за културу войводянских Руснацох и Амбасада України у Беоґрадзе хтора финансийно потримала три тогорочни виданя Установи, а чий Треци секретар за протокол, културу, дияспору и контакти з медиями  Дарина Гариб була на промоциї наших кнїжкох.

На Сайме ше исти дзень  представел и Завод за културу войводянских Руснацох зоз своїма виданями „Руснаци од присоєдинєня по Просвиту” автора др Дюру Гардия и „Зборнїк роботох зоз 4. Науковей конференциї младих науковцох и фаховцох” о хторей бешедовал єден з редакторох Саша Сабадош.

Як потолковала директорка Заводу Анамария Ранкович, гоч тогорочна продукция нє обсяжна, два спомнути виданя сполнюю значни функциї Завода за културу войводянских Руснацох, а то чуванє и промовованє руского скарбу, и потримовка младим припаднїком рускей заєднїци и їх уключованє до явного живота заєднїци.

ПОВЯЗАНИ ТЕКСТИ