БЕОҐРАД – На 60. Медзинародним сайме кнїжкох у Беоґрадзе, на штанду Покраїнского секретарияту за културу и явне информованє, штварток, 29. октобра свою рочну видавательну продукцию вєдно представели НВУ „Руске слово” и Завод за културу Войводянских Руснацох. Гоч було наявене окремне, було то заєднїцке представянє обидвох видавательох.
Шейсц нови кнїжки представело Видавательне оддзелєнє „Руского слова” – „Осце и черешнї” Агнети Бучко Папгаргаї, „Слово Бояна Двокраяна” Владимира Бесерминя, „Вселенска черкотка” Миколи Шанту и „Гришка” Асї Папуґа, „Галов” Ирини Гарди Ковачевич, а „Руске” представело и поетесу Тамару Хринову, як побиднїцу прешлорочного Фестивалу поезиї младих у Вербаше. О нових кнїжкох бешедовали одвичательни редактор Видавательного оддзелєня Микола Шанта, рецензент Олена Планчак-Сакач, академик Юлиян Тамаш, як и сами авторе.
Завод за културу войводянских Руснацох предствел пейц свойо кнїжки – „Руснаци у Вербаше”, „Вини и зради” Штефана Гудака (преложену на українски), „Польодїлска лексика” Александра Мудрия, „Ґерманизми у руским язику” Андреї Медєши и каталоґ „Шицко то оглашки и реклами”. О кнїжкох бешедовал директор Заводу Серґей Тамаш, як и авторе.
Штанд Покраїнского секретарияту за културу и явне информованє, односно виданя НВУ „Руске слово” и Заводу за културу Войводянских Руснацох исти дзень пополадню нащивели и школяре и професоре з керестурскей Школи „Петро Кузмяк”.
Присутни писателє и спомнути редактор Микола Шанта, за школярох орґанизовали мали квиз знаня о рускей литератури, а за точни одвити школяре на дарунок подоставали нашо руски кнїжки.
