БЕОҐРАД – Пондзелок, 19. януара на Богоявлєнє, после Служби Божей, хтору служел парох о. Владислав Варґа, Руснаци у Беоґрадзе и їх госци преславели Националне швето Руснацох у Сербиї.
На Службу и програму з тей нагоди пришли вецей парохиянє як звичайно, представителє Амбасади України у Беоґрадзе, римокатолїцки священїки, алє и припаднїки других народох – Серби, Словенци и Горвати. Тиж так, присуствовали и надосц младши Руснаци з Беоґраду, медзи нїма и таки котри першираз пришли до нашей церкви св. Кирила и Методия.
На програми Олґица Лендєр Радович у привитним слове и винчованки наглашела значносц чуваня своїх кореньох, обичайох, вири, язика и култури, Олґица Стаменич (Канюх, родом з Петровцох), пречитала виривки з поеми „Чукундїдов ошмих” Михала Рамача, а др Йоаким Стрибер бешедовал о Александрови Духновичови, а пречитал и його познату писню „Порученє” („Я Русин бул”).
По програми, друженє присутних предлужене у просторийох парохиї, дзе шпивани нашо шпиванки, а парохиянє ше з о. Владиславом Варґом догварели и о пошвецаню їх обисцох у Беоґрадзе.