НОВИ САД – Понеже Републична Влада нє одобрела преруцованє 4,4 милиярди динари до покраїнскей каси, Покраїнска влада пияток, 2. октобра, прилапела Предлог скупштинскей одлуки о ребалансу буджету АПВ за 2015. рок. З ребалансом предвидзене зменшанє актуалного буджету за 4,34 милиярди динари, та вон тераз будзе 59,6 милиярди динари.
По ребалансу буду значно зменшани даваня за директни капитални укладаня з буджету, як и потримовка општином и другим установом за капитални укладаня. Плановане же за капитални укладаня того року буду опредзелєни 15 милиярди динари, а по ребалансу тота сума будзе за 2 милиярди менша.
Як сообщела Покраїнска Влада, причина нєдостатку пенєжу у войводянскей каси то драстични пад приходох з порцийох. Прето пред мешацом послата вимога до Републичней Влади же би преруцела потребни пенєж до Покраїни, медзитим з Министерства финансийох сцигол одвит же „вимога Покраїнскей влади нє ма основу“.
Покраїнски секретар за финансиї Зоран Радоман гварел же по Закону о буджетскей системи постої можлївосц питац средства од Републики, алє вона нє обовязна дац их. Медзитим, як гварел, вимога Покраїни ма основи, понеже Република уж на таки способ помагала локалним самоуправом.
– Прето велї проєкти у Войводини буду витворени у меншим обсягу, лєбо нє буду витворени, та єдна часц будзе преруцена за идуци рок – гварел Радоман.
Предлог ребалансу буджету Скупштина АПВ будзе розпатрац на стреду, 7. октобра, на своєй 47. схадзки.