НОВИ САД – У Заводзе за културу войводянских Руснацох (ВР), вчера, 5. октобра, отримана промоция кнїжки Штефана Гудака „Вини и зради” на українским язику – „Про вини i зради”, як часц вецейрочного проєкту Заводу у рамикох хторого ше нашу руску творчосц, єй найрепрезентативнєйши твори, преклада на даєден шветови язик.
Присутних привитали директор Заводу за културу ВР мр Серґей Тамаш и помоцнїк покраїнского секретара за културу и явне информованє Атила Югас, котри задлужени за културу националних заєднїцох. Югас, медзи иншим, наглашел важносц прекладаня творох, а редактор Видавательного оддзелєня НВУ „Руске слово” Микола Шанта окреме визначел же з тим прекладом сполнєте жаданє автора же би му творчосц була преложена на українски язик, лєм нажаль, автор то нє дочекал.
Кнїжку преложела Вира Бродович, лекторовала Зоя Шанта, котра на вчерайшей промоциї по українски пречитала и виривок з Гудаковей приповедки „Хлiб и сiль”. Ирина Гарди Ковачевич и академик Юлиян Тамаш бешедовали о живоце и творчосци Штефана Гудака, а промоцию збогацела Танита Ходак, з облюбену Гудакову шпиванку „Плива кача по Тисини”.
З прекладом збирки приповедкох Штефана Гудака руску творчосц тераз годни читац и вельочислени читателє у України, та з тим наша литература достава рамики штреднєевропскей.
