Ювилейна „Ружова заградка” 1. марца

автор амр
1.4k Опатрене

НОВИ САД – Того року Фестивал рускей народней шпиванки „Ружова заградка”, хтори будзе 1. марца, свою 25-рочнїцу означи зоз 16 новима композициями котри збогаца музични фонд рускей музики у народним духу.

На конкурс „Ружовей заградки” сцигли 29 композициї, а Конкурсна комисия у составе Зоран Дракула, Дюра Будински, Владимир Сивч и Олена Планчак Сакач, вибрала 16 композициї хтори буду виведзени на Фестивалє.

– Ґенерални упечаток Комисиї же з вибранима композициями покрити шицки места у хторих жию Руснаци у Войводини, та и Горватскей, а медзи композициями хтори сцигли на конкурс було вельо добри, прецо Комисия мала чежки задаток вибрац 16 за виводзенє на „Ружовей заградки” – гварела музична редакторка у РНС и длугорочни член орґанизацийней екипи Фестивалу Татяна Колєсар Ґвоїч, додаваюци же  тогорочна „Ружова заградка” дава шансу и вецей младим шпивачом и автором.

За 25. Фестивал вибрани композициї Агнети Тимко, Александра Човса, Ани Бучко, Боривоя Бору Андєлича, Владимира Толму, Владислава Надьмитю, Драґани Ґлувня Бабич, Юлияна Рамача, Маґдалени Горняк Лелас, Мирона Сивча, Мирослава Папа, Михайла Будинския, Михала Лїкара, Константина Чордаша, Ондрея Маґловского и Татяни Колесар Ґвоїч.

И того року найлєпши текст, интерпретацию и аранжман оценї фахови жири, а будзе вибрана и найлєпша шпиванка по думаню публики.

 

ПОВЯЗАНИ ТЕКСТИ