НОВИ САД – Завод за културу войводянских Руснацох вчера у совїх просторийох представел часц векшого проєкту – каталоґ „Кодификованє руского народного облєчива”. Автор каталоґу мр Катарина Радисавлєвич, музейски совитнїк-етнолоґ з Музею Войводини, а попри авторки, на представяню бешедовали и др Янко Рамач, Йоаким Рац, Микола Ґубаш, Звонко Костелник (з Горватскей) и директор Заводу мр Серґей Тамаш.
Як наглашене, каталоґ за нашо народне облєчиво и танци лєм увод до велькей студиї хтору роби роботна ґрупа, у хторей нашо хорероґрафе з Войводини и Горватскей и фаховци етнолоґи.
У каталоґу обявени даскельо прилоги о народним облєчиве и танцу як часци руского идентитету, пременки хтори настали зоз селїдбу и животом у тих крайом, та о способе и правилох облєканя наших женох и хлопох. Прилоги илустровани зоз старима фотоґрафиями, алє и сучаснима, на хторих указани поступок облєканя, чесаня и друге.
