НОВИ САД – У Руским културним центре у Новим Садзе, всоботу, 13, юния, отримани 14. по шоре Фестивал дзецинскей творчосци Руснацох Войводини „Веселинка 2015”. Фестивал урядово отворел предсидатель Националного совиту Руснацох Славко Рац, котри и з тей нагоди поволала родичох же би дзеци уписовали до руски оддзелєньох и посилали на годзини пестованя руского язика, бо знанє ище єдного язика лєм на хасен – як школяром, так и нашей заєднїци.
На програми тогорочней „Веселинки” участвовали вецей як 200 дзеци зоз скоро шицких основних школох дзе ше руски язик учи як порядни, лєбо виборни предмет, аж о зоз Сримскей Митровици и Сримскей Каменїци, а тиж и дзеци з КУД „Тарас Шевченко” з Дюрдьова, Руского КУД „Др Гавриїл Костельник” з Кули, КУД „Жатва” з Коцура, КПД „Карпати” з Вербасу, як и аматере домашнього, новосадского РКЦ. Були и госци з иножемства, з Миклошевцох, з Горватскей.
На програми дзеци указали же знаю щпивац, рецитовац, танцовац, алє и ґлумиц и рисовац, бо пополадню, уж по традициї, дзеци у РКЦ мальовали по мурох. Потим дзецинска драмска ґрупа РКЦ виведла представу „Медведзова женїдба”, а у дворе Центру дзеци анимировали жонґлере и Мистер Твистер.
Було то ище єдно длугоке друженє школярох з рижних наших местох за паметанє, нагода упознац ше з товаришами и товаришками и пестовац руски язик, хтори, нажаль, нє шицки маю нагоду бешедовац и дома.
