Файта животинї:

Ящурка – леопард ґекон.

Як мено твойому любимцови? Хто му вибрал мено?

Мено му Лєв Ґеко, а мено му вибрал Дарио.

Кельо ма роки:

Ґеко ма 5 роки.

Як вон випатра? Можеш го описац?

Били є з чарнима точками, ма вельки, груби хвост и жовти очи. Нє вельки є, нє чежки є и месци ше на длань.

Цо твой любимец найволї робиц?

Єсц, спац, облїзовац ше и пендрац ше. Люби ше гласкац.

Зоз чим го кармиш?

Кармиме го зоз хлїстами, хробачками, а люби и овоц и желєняву.

Як ше ви зоз нїм бавице?

Гласкаме го и пущиме го най дакус бега и розцагнє ножки, бо му терариюм нє барз вельки. Чисциме му терариюм и помагаме му кед нє може сам зняц скорку, хтору одруцує два раз мешачно.

Можеце нам виприповедац даяку шмишну ситуацию зоз нїм?

Раз сом го однєсол до оводи, най го видза мойо пайташе. И праве теди почал знїмац скорку, та ше дзеци зачудовали, бо нїґда нє видзели таке дацо. Шмишне було кед ше ми опитали чи то його болї – приповеда Дарио.

Чи бисце препоручел и другим дзецом же би себе набавели такого любимца и прецо?

Я любим еґзотични животинї, а нє тоти яки шицки маю. Вшелїяк бим го препоручел шицким цо сцу мац дацо иншаке и интересантне у обисцу. Нєт вельо роботи коло нього, окрем накармиц го и старац ше же би вше мал швижей води. И вец ище важне же є нє гласни, нє прави галайк и наисце ше лєгко о старац о нїм, окреме кед ше жиє у квартелю. Ма свой терариюм дзе му вше цепло, нє влачи, нє зацагує ше койкадзи, нє прави чкоди, нє ґалами, нє треба го шейтац, а вше нас дочека – гвари Дарио.

Маце дома ище даяки животинї?

Дома нє, бо жиєме у квартелю, алє у баби маме кандура Спайкия и заяца Пуфночку.