ДЮРДЬОВ – У дюрдьовскей парохиї Рождества Пресвятей Богородици на Вилїю по юлиянским календаре, 6. януара на 9 годзин Службу Божу Василия Велького з Вечурню служели дюрдьовски парох о. Йоаким Холошняй, о. Борис Холошняй з Бечу и ґосподїнски парох о. Михаил Холошняй.
Пред вечаром дзеци и млади ходзели по шпиваню по обисцох родзини, сушедох и приятельох, окреме у Рускей улїци у Дюрдьове, дзе капурки того вечара були ширцом отворени и дзе велї хижи оквицени за Крачун.
О. Борис Холошняй Крачунске Всеночне служел на 22 годзин, дзе шпивали члени Холошняйовей фамелиї, а вчера, на Перши дзень Крачуна, Архиєрейску Службу Божу предводзел наш владика Георгий Джуджар. Сослужовали о. Борис Холошняй и о. Йоаким Холошняй, а Службу звелїчал Хор „Розанов”, под руководительством Татяни Барна, у хторим шпивал и ґосподїнски парох о. Михаил Холошняй.
– Ми нєшка славиме вельке и радосне швето народзеня сина Божого, швето приходу самого Бога медзи нас, котри ше з любови ґу людзом понїжел и приял цело чловека же би нас ошлєбодзел од шмерци, же би место нас одпокутовал за нашо грихи и помирел нас з Господом Богом, знова нам отворел дзвери до Царства Божого – гварел кир Георгий у казанї.
На вчерайшей Архиєрейскей Служби богослов Данил Задрепко з Дюрдьова пошвецени за швичконосца и за чтецца (дзияка), на чим му повинчовали владика Георгий и дюрдьовски парох о. Йоаким Холошняй. Задрепко на Папским универзитету „Урбаниана” у Риме дипломовал филозофию, а школованє предлужел у Ужгородзе, у України, дзе є на остатнїм року Богословскей академиї „Бл. Теодора Ромжи”.
У Дюрдьове нєшка и на ютре, на Други и Треци дзень Крачуна буду по два Служби Божо – на 9 и 17 годзин, а на Треци дзень после обидвох службох будзе и мированє.
