Файта животинї: Пес

Як мено твойому любимцови? Хто му вибрал мено?

Мено єй Зои. Я єй вибрала мено, а достала ю по куцовови нашей ґрумерки Тамари.

Кельо ма роки?

Ище є малючка, ма полни два мешаци.

Як вона випатра? Можеш ю описац?

Доганова є, куштрава, ма и доганово очка, и барз є мегучка.

Цо твой любимец найволї робиц?

Люби ше бавиц зоз дзецми, а окреме люби кед ше я бавим зоз ню.

Зоз чим ю кармиш?

Донєдавна пила млєчко, тераз почала покус ґранули, меска и водички.

Як ше ти зоз ню бавиш?

Найволїм ю притулїц ґу себе и ношиц на рукох. Бегац з ню по дворе и вожиц ю у корпочки на бициґли.

Можеш нам виприповедац даяку шмишну ситуацию зоз ню?

Було то кед щенє почало праве ходзиц. Нє могли зме ю найсц, подумали зме же ше нам страцела. На щесце, вона лєм надумала дакус оддримац, и зацагнуц ше до желєнїдла на дворе. Шицки зме оддихли кед зме ю нашли, и сладко ше почали шмеяц. 

Чи би ши препоручела и другим дзецом же би себе набавели такого любимца и прецо?

Препоручела бим шицким же би мали даєдного любимца. Так маце вше товариша розположеного за бависко. Окреме цикаве кед го учице дацо. Ми шицки дома уживаме у наших куцовох, барз их любиме, а и вони нас.

Маш дома ище даяки животинї?

Мам. Ище два пшички. То мама Пуфна и тато Бинґо щенєца Зои.