КОЦУР – У велькей сали Месней заєднїци (МЗ) у Коцуре вчера на 20 годзин отримана шветочносц з нагоди Националного швета Руснацох у Сербиї, хтору орґанизовала Подручна канцелария Националного совиту (НС) Руснацох у тим месце.
После гимни Сербиї и нашей шветочней шпиванки, привитне слово отримала Ксения Бенце спред Општини Вербас, а потим и предсидатель НС Руснацох Славко Рац. На програми присуствовали и подпредсидатель НС Микола Шанта, член Совиту и дотерашнї руководитель коцурскей Подручней канцелариї Микола Ґубаш, члени одборох НС з Коцура Весна Раґаї-Цап, Микола М. Цап, Ксения Бесерминї и Серафина Яґлица, предсидатель Совиту МЗ Коцур Желько Бєлан, представителє церкви, школи и векшини установох и здруженьох у Коцуре.
Програму водзел Микола Ґубаш, а у нєй участвовала Руска женска шпивацка ґрупа КУД „Жатва”, хтору на гармоникох провадзели Любомир Сакач Андри и Желько Фаркаш, потим Танита Ходак и Михайло Будински з музичнима точками, Микола Шанта пречитал реферат з тему „Рошнї там дзе ши пошати”, а свойо писнї пречитали Силвестер и Серафина Макайово.
През цалу програму ше прецаговала тема Руснацтва, родолюбия и националней свидомосци, а розгварка на тоти теми предлужена и после програми на пригодним коктелу, тиж у просторийох МЗ.
