ШИД – З пригодну акакдемию, хтору пририхтали члени Културно-просвитного дружтва „Дюра Киш”, вчера у Руским доме у Шидзе означене Националне швето Руснацох.
Швето присутним повинчовали предсидатель Дружтва Златко Манько, парох шидски и декан сримски о. Михайло Режак и заменїк предсидателя Општини Шид Срдян Малешевич.
През стихи, здогадованє на историйни подїї о насельованю Руснацох и шпиванку, програму збогацели Саня Тиркайло, Зденко Лазор, Срдян Малшевич (котри пречитал єдну свою писню), мр Вера Дупало, Ясминка Димитриєвич и Мирон Джуджар, як и Младша шпивацка ґрупа КПД „Дюра Киш”, хтора ше представела з венчиком колядох и шпиванку „Хижочко стара” Михайла Ковача.
Сала Руского дому була украшена з малюнками Андєлки Античевич, Олґици Чизмар, Олґици Лукач и Ратка Торми, а тиж и з рускима кнїжками и народнима календарами.
После урядовей часци означованя швета ушлїдзел коктел, дзе на етно-столє служени стародавни руски єдла.
На означованю Националного швета Руснацох у Шидзе присуствовали и Руснаци з Бачинцох, Беркасова и Бикичу.
