СУБОТИЦА – Вчера на 12 годзин у просторийох Дружтва Руснацох у Суботици отримани коктел з нагоди Националного швета Руснацох у Сербиї. Пририхтана и кратша програма на хторей участвовали Мая и Тамара Емеди, котри одшпивали два руски народни шпиванки.
Госцох привитала подпредсидателька Дружтва Ксения Палатинус, окреме помоцнїцу городоначалнїка Суботици задлужену за културу Етелу Єринкич, предсидателя Вивершного одбору Националного совиту Руснацох Желька Ковача, представительох Сербского културного центру „Святи Сава”, Здруженя Бошнякох, Здруженя Македонцох „Илинден”, Словенцох „Триґлав”, Бунєвацкей матки и шицких присутних членох Дружтва.
Етела Єринкич спред локалней самоуправи повинчовала Руснацом Националне швето, зоз жаданьом же би ше руска заєднїца у Суботици ище длуго отримала, а оглядла ше и на питанє ришованя нових просторийох за Дружтво, з обецунку же локална самоуправа цо скорей риши тото питанє.
Желько Ковач тиж шицким Руснацом у Суботици повинчовал Националне швето, пожадал же би ше ище длуго роки сходзели, наглашуюци значносц очуваня рускей националней заєднїци и у штредкох дзе Руснацох нєт вельо. За тото нєобходна потримовка локалней самоуправи, окреме пре терашню ситацию у якей Дружтво Руснацох у Суботици, понеже просториї може хасновац ище лєм два роки.
За шицких присутних пририхтана закуска з нашима националнима єдлами, хтори госцом котри нє Руснаци вше барз интересантни, а Шветочносц у Дружтве Руснацох зазначела и суботицка „Ю ЕКО” телевизия
