НОВИ САД – Композиция „Нїґда нє дознаш” Татяни Колєсар Ґвоїч, на текст Мирослави Даждиу, преглашена за найлєпшу по думаню фахового жирия, а композиция „За щесце” Мирослава Папа, тиж на текст Мирослави Даждиу, за найлєпшу по думаню публики на ювилейним, 25. Фестивалє рускей народней шпиванки „Ружова заградка”‚ хтори вчера вечар отримани у Студию М Радио Нового Саду.
Награду за найлєпши текст достали Татяна и Михайло Будински, за текст шпиванки „Лампащики”, награду за аранжман Зонар Мулич, за композицию „Пребаченє”, а награду за интерпретацию достала Танита Ходак, за виводзенє шпиванки „Миклошевска любов”.
Композициї хтори достали награди на Фестивалє шпивали Мирослава Даждиу, Йовґен Надь, Михайло Будински и Борис Маґоч.
З провадзеньом преширеного Велького народного оркестру РТВ, под руководительством Зорана Мулича, та Студийскей вокалней ґрупи, на ювилейней „Ружовей заградки” виведзени 16 нови шпиванки наших композиторох и авторох текстох, хтори шпивали младши и уж афирмовани шпиваче у рускей музики. Нови композициї оценьовал фахови жири у составе Дюра Будински‚ Олена Сеґеди‚ Стефан Семянив и Микола Шанта, а за награду публики того року гласали присутни патраче у Студию М.
Ювилей Фестивалу означени и з окремну ревиялно-ретроспективну часцу, у хторей 11 шпиванки цо настали на „Ружовей заградки“ и зажили у народзе виведли нашо познати шпиваче, медзи нїма и популарна ґрупа „Роса”, хтора ше, после длугшого часу, позберала за тоту нагоду.
Подпомогнути зоз спонзорами, орґанизатор и ґенерални покровитель и 25. Фестивалу була Радио-телевизия Войводини, так же Фестивал урядово отворел директор Радио Нового Саду Йожеф Клем, котри визначел значносц Фестивалу за цалу руску заєднїцу, як и же „Ружова заградка” дотераз принєсла вецей як 300 нови, ориґинални композициї. Клем подзековал шицким котри на даяки способ допринєсли же Фестивал дожил свою 25-рочнїцу.
Пред музичну часцу, у рамикох Фестивалу Єлена Перкович у голу Студия М отворела заєднїцку виставу наших уметнїкох з Вербасу – виставу малюнкох Владу Нярадия, з назву „Карпатски мит” и виставу диґиталних принтох младей уметнїци Кристини Ґшвенґ, з назву „Красота задуманей жени”.
„Ружову заградку” могло директно провадзиц прейґ Другей програми РТВ и трецей мрежи Радио Нового Саду, односно на 100 МHz, як и на интернету – през опцию Програма на живо, дзе ше потим вибере ТВ (опция ТВ2), лєбо Радио (опция РНС3).
