НОВИ САД – У Руским културним центре у Новим Садзе всоботу, 6. децембра, у рамикох Манифестациї „Днї Миколи М. Кочиша”, отримана пригодна програма, хтора почала з отвераньом вистави 28 малюнкох з Дзевятей Подобовей колониї „Стретнуце у Боднарова” отриманей у юлию прешлого року у Ґосподїнцох. Виставу отворел академски маляр Боривоє Андреєвич.
Програма предлужена з представяньом кнїжки „Жвератко нашей младосци” учителя Дюру Лїкара з Миклошевцох – моноґрафиї нашей школи у Миклошевцох у хторей, як сам автор наглашел, ретроспектива живота и роботи школи од 1950. року по нєшка.
Кнїжка видата у Едициї „Одняте од забуца”, з помоцу ресорного министерства Републики Горватскей, Општини Томпоєвци и Дружтва за Руски язик, литературу и културу у Нового Саду.
У пригодней програми наступели и школяре з Нового Саду, котри пречитали даскельо писньочки, а дзеци з Миклошевцох, з КУД „Яким Ґовля” ше у Новим Садзе предсатвели з пригодним рециталом, шпиванку и танцом.
На законченю програми, автор Дюра Лїкар дзепоєдним присутним подзелєл прикладнїки своєй кнїжки.
З рижнороднима програмами по наших местох, 24. „Днї Миколи М. Кочиша” тирваю по 14. децембер.
