НОВИ САД – На другей схадзки Националного совиту (НС) Руснацох, хтора всоботу отримана у Новим Садзе, за члена Совиту за медзинационални одношеня Городу Нови Сад вибрана Ирина Папуґа, котра и у прешлим составе того цела представяла руску заєднїцу. Совит роби при Скупштини Городу Нови Сад.
Папуґову за други мандат предложел предсидатель НС Руснацох Славко Рац, котри похвалєл єй анґажованє у дотерашнєй роботи того городского цела.
За членство до Совиту за медзинационални одношеня Городу на схадзки предложени член НС Руснацох з Нового Саду Миломир Шайтош, котрого кандидовала Олена Папуґа, та директор новосадского хору „Гармония” Борис Сакач, котрого предложел Мирослав Кевежди.
Одлука принєшена з гласаньом, так же Ирина Папуґа достала осем, Миломир Шайтош шейсц, а Борис Сакач штири гласи.
За убудуце препоручене же би у предкладаню членох до подобних целох у општинох и городох главну улогу мушели мац представителє того локалного штредку, гоч остатнє слово дава Национални совит.
Попри представительох сербскей, у Совиту за медзинационални одношеня маю словацка, руска, горватска и мадярска национална заєднїца, котрих за членох до того цела вибераю их национални совити.
На вимогу Городскей управи Нови Сад, Национални совит Руснацох всоботу дал позитивне думанє о предкладаньох за даванє менох тром улїцом на подручу городскей општини.
