НОВИ САД – Нєшка, 8. априла Шветови Дзень Ромох, а з пригоднима бешедами и винчованками представительох Покраїнскей влади, републичних и покраїнских институцийох, та локалних самоуправох и културно-уметнїцку програму, у сали Скупштини АПВ у Новим Садзе Шветови дзень Ромох означени вчера.
Предсидатель Покраїнскей влади Боян Пайтич бешедовал о роботи Покраїни на унапредзеню положеня ромскей националней меншини, окреме у обласцох образованя и обезпечованя роботи, за цо найбаржей заслужна Канцелария за инклузию Ромох, алє ище вше єст проблеми.
– Роми, вшелїяк, социялно найзагроженша заєднїца, нє лєм у Сербиї, алє у цалей Европи. Тота популация пейц раз худобнєйша од гражданох других националносцох, а кажди стоти Ром дожиє 60 роки. То драматични податки и прето ми у Влади робиме на злєпшованю положеня националних заєднїцох – гварел Пайтич.
Того року закончена Декада ромох, алє оценєте же и далєй треба робиц на злєпшованю условийох живота и положеня Ромох, та Декада предлужена и друга будзе тирвац по 2025. рок.
Винчуюци швето припаднїком ромскей националней меншини, директор Канцелариї за инклузию ромох Душко Йованович поручел же би означованє того дня шицким гражданом мало обрациц увагу на барз чежке положенє Ромох у Сербиї, алє и у цалим реґионє.
