Катарина Бесерминї, III, Коцур
ДОЖИЦЕ ЗОЗ БРАТОМ
Я любим буц у природи. Там сом мал вельо дожица.
Єдного дня сом ишол на змаганє у лапаню рибох. Ишол сом з братом. Станули зме на пейц рано. Ишли зме до Сивцу. Там зме достали по маїцу, сендвич и сок. Мушели зме вжац лабдочку на хторей писали числа. Я вибрал число 38. Пущали зме венєц. Кед зме пошли на свойо места, могли зме почац лапац риби. Ми перше нїч нє влапели. Познєйше кед запискали, могли зме заменїц места. Теди ми ше влапела риба. Брат ми сцел помогнуц. Вон ше зошлїснул и риба ше одквачела и сцекла.
Заш лєм, я ше барз фино препровадзел.
Давид Тимко, IV, Коцур
МОЙО НАЙМИЛШЕ БАВИСКО
Мойо наймилше бависко то моя бабка, хторей мено Маринка. Часто ше зоз ню бавим и крашнє ю облєкам. Кед сом була мала, мама ми куповала сукенки, до котрих тераз облєкам бабку Маринку. Мам за ню и кочик у хторим ю ґурам по дворе.
Доротея Чизмар, II, Руски Керестур
ЦО СОМ ДОСТАЛА ОД МИКОЛАЯ
Пияток рано кед сом ишла до школи, попатрела сом на облачок и нє було писемка, а и сличка зоз облака була поцагнута.
Перше зме були у церкви. Кед зме пришли з церкви, опрез дзверох нас дочекали вельо дарунки. Я Миколайови написала най ме нєсподзива и наисце ме барз нєсподзивал. Шицки у нашей фамелиї питали тото цо сцели, та зме тото и достали. Було пополаднє и нє могла сом дочекац кеди Миколай придзе… Достала сом бабку зоз бициґлу, манчмелов и ботоши. У дарунку хтори сом достала зоз церкви були лакотки, смоки, чоколадки, чипс и лїзалка.
Ивона Настасич, III, Руски Керестур
ПРИХОД МОЄЙ РОДЗИНИ
Нєшка сом бул у школи, бул пияток. То бул остатнї дзень у тижню. Приблїжує ше приход мойого братняка и шестринїци. То будзе од 20. по 30. децембер. Будземе их чекац баба и я од пол ноци до рана. Братнякови мено Лука, а шестринїци Илияна. Док вони ту, шицки днї будзем спац у баби. Будземе спац у дньовей хижи шицки вєдно. Там нам будзе добре, будземе правиц колбаси и шкварки. Мой братняк и я будземе оправяц бависко на сонию, а док го оправиме, будземе го бавиц. Вони приходза на авту, та им будзе требац вельо часу най сцигню. Приходзи лєм татов брат, то мой бачи и мено му Душко. Я го волам Душко Дуґоушко. Приходзи их и моя шестра опатриц, мено єй Лена, а дакеди ю волам Лена Маґдалена. Вона ма 13 роки, братняк 12, а шестринїица седем.
Видак Ковачевич, III, Руски Керестур
КЕД БИМ МАЛА ЧАРИВНУ ПАЛЇЧКУ
Кажди чловек котри ше народзи на тим швеце ма вельо жаданя. Даєдни лєгко виполнїц, а даєдни чежко. Углавним шицки жадаю материялни ствари, хижи, авта, красни мебель… Нїхто нє роздумує о здравю, а то найвекше богатство.
Велї людзе на тим швеце хори, а медзи нїма и беби и дзеци. Дзеци котрим знїщене дзецинство пре рижни хороти. Вони ше муша лїчиц, ходзиц по шпитальох же би виздравели. То велька трапеза як за дзеци, так и за родичох.
Любела бим мац чаривну палїчку з хтору бим вдерела по жеми, вилєцели би чаривни искри и попадали на глави хорих дзецох же би вони були щешлїви, радовали ше дзецинству, же би ше з нами бавели, ходзели до школи и уживали у каждодньовим живоце.
Катарина Бесерминї, III, Коцур
МОЙО НАЙМИЛШЕ БАВИСКО
Мойо наймилше бависко то лабда. Мам их дома барз вельо. Моя наймилша то тота хтору сом купел на Кирбаю. Вона помаранчецовей фарби. Любим ходзиц на фодбал. Физичне ми наймилши предмет, праве пре лабду. Зоз пайташами ше часто зоз ню бавиме.
Свою наймилшу лабду добре чувам же би ше нє пребила.
Тони Пашо, II, Руски Керестур
СТРЕТНУЦЕ ЗА ПАМЕТАНЄ
„Стретнуце за паметанє” – саме мено гвари же то цошка важне. За мнє то стретнуце зоз моїма пайташами зоз оводи.
Своїх товаришох сом нє видзела седем роки. Длуго сом чекала же бизме ше стретли. Фичо и Ниджо ми були найлєпши товарише. Ми тройо були нєроздвойни. Єдного дня сом мала нагоду нащивиц свою оводу „Слунечнїк” у Старим Вербаше. Друженє нам орґанизовала наша воспитачка Верка. Там були и мойо товарише. Була сом щешлїва и приємно нєсподзивана, нїхто нє думал же ше то случи. Шицки зме остали исти, лєм зме одросли. Овода ше нє пременєла вельо, а памятки остали. Теди сом ше здогадла кед ми Фичо дал червену ружу за Дзень женох и яка сом була щешлїва. Ниджо вше шедзел зо мну кед зме даґдзе ишли, та сом ше нє старала о находзеню пари за шедзенє. Здогадла сом ше красних хвилькох хтори сом дзелєла зоз нїма. Облапели зме ше зоз вельким ошмихом на твари.
Щири товаришства ше нє забува и шицки стретнуца и розгварки за паметанє.
Николина Маґоч, VII, Коцур
МЕДВЕДЗ И ПЧОЛИ
Єдного дня, медведз ше шейтал по лєше глєдаюци поживу.
Предвечаром, на жеми под єдну кошнїцу нашол малу барку меду и шицко вилїзал. Зоз полним брухом пошол до свойого дому. Пчоли, кед видзели же нєт тельо меду кельо нєшка направели, барз ше нагнївали. Вони знали же єдина животиня хтора би поєдла тот мед то медведз. Пошли до ньго и док вон мирно спал, цалого го поджобали зоз своїма жадлами и задовольно пошли назад до кошнїци. Вони з тим медом цо остал накармели свойо дзеци и кралїцу.
Рано, кед ше медведз зобудзел, видзел же го пчоли цалого поджобали, алє ше нє гнївал, бо знал же то прето же им вчера краднул мед.
Андрей Горняк, VI, Коцур
