Мено и презвиско:
Андрей Надь
Зоз чим ше точно занїмаш?
Електричар сом на терховней ладї хтора путує прейґ океану. На ладї оправям шицко цо роби на струю, наприклад, вельки фрижидери у хторих ше превожи поживово продукти.
Яку школу треба закончиц же би дахто могол тото робиц?
Штредню фахову школу, а мож и факултет, потим додатни обуки за одредзену обласц у тим фаху.
Яки ше там предмети учи?
Учи ше як настава струя, як ше преноши до обисцох и як руковац зоз ню. Тиж так, о шицких апаратох хтори робя на струю.
Цо шицко треба знац кед сцеш буц добри електричар?
Же биш бул добри у своєй роботи, насампредз ю треба любиц!
Дзе електричаре можу робиц?
Понеже нєшка нїч нє функционує без струї, мой фах глєдани практично у каждей установи, институциї и фирми. Тиж, тот фах ше дзелї на вецей обласци.
Одвше ши сцел робиц праве тоту роботу?
Нє. Кед сом бул менши, сцел сом буц кухар. Пред конєц основней школи зацикавела ме струя и шицко цо повязане з ню.
Цо найкрасше у тей роботи?
Кажди дзень ше роби цошка иншаке и нове, у контакту ши зоз велїма людзми. Важне буц успишни як поєдинєц, алє и у тимох.
А цо найчежше?
Мнє, як електричарови на ладї, найчежше тото же сом по даскельо мешаци одвоєни од дому и робиме у иншаких условийох як ту, на побрежю.
Яка особа треба же би була, же би була добри електричар?
За тоту роботу треба буц, насампредз, осторожни и треба мерковац. Треба буц порихтани на усовершованє и ученє. Тиж так, треба буц схопни з алатом.
Чи то опасна робота и на цо окреме треба мерковац?
Гей, робота електричара зна буц опасна. Часто ше случує же робиме на висини, або под напруженьом. Алє, кед ше меркує и почитує правила, нє приходзи до опасних ситуацийох. Вшелїяк, дзеци нє шму рушац струю, бо то опасне!
Єст и жени хтори робя тоту роботу?
Тот фах при женох популарнєйши у швеце. Нажаль, у нас сом ше нє стретал зоз женами у тей професиї.
Яки алат електричаре найчастейше хасную?
Же би ше нашло ришенє за даяки проблем, електричаре хасную рижни инструменти як цо то мултиметер, ампер клїщи меґер… Тиж, хаснуєме и каждодньови алат як цо то клїщи, млаток, шрафциґери, а барз важна и драбинка.
Муши ше ношиц даяки окремни шмати на роботу?
Гей, ношиме окремни шмати, як цо то комбинезон зоз длугима рукавами, ципели хтори маю окремну защиту на пальцох и джонох. На пальцох єст защита же бизме их нє покалїчели кед нам дацо спаднє на ногу. Джони окреме изоловани пре окруженє у хторим ше рушаме.
Цо биш поручел дзецом хтори сцу постац електричаре док вирошню?
То барз интересантни фах хтори поглєдує нєпреривне напредованє и ришованє нових задаткох и проблемох. Думам же то супер вибор за младших, понеже технолоґия вше напредує, а тот фах провадзи тото напредованє, отвераю ше вше вецей можлївосци за роботу.