За роботи на Катедрали потребни дополнююци пенєж

автор маф
1.1k Опатрене

РУСКИ КЕРЕСТУР – Роботи на фасади Катедралней церкви св. оца Миколая у Руским Керестуре напредую и обчекує ше же буду закончени до конца рока, алє за нїх потребни и дополнююци пенєж, дознава Рутенпрес од керестурского пароха о. Михайла Малацка.

7-Katedrala-02

На будинку церкви ше обива мури по верх, знова малтерує, а будзе положена и нова фасада. Як гварел парох о. Малацко, дотераз виводзачови роботох уплацени 45 000 еври, хтори з найвекшей часци обезпечени з донацийох з Керестура и иножемства, а 600 000 динари, прейґ конкурсу, з Канцелариї за одношеня з церквами и вирскима заєднїцами при Министерстве правди.

Медзитим, попри планованих роботох указали ше и нови, хтори настали як пошлїдки  влаги, та оценєте же за доконченє шицких планованих роботох потребни коло 70 000 еври, алє цалосна сума ище нє обезпечена. Прето парох о. Малацко поволує шицких котри можу и жадаю, же би и надалєй помогли у тим вельким подняцу санированя влаги на церкви.

Роботи почали концом септембра и дотераз обити и омалтеровани мури од Маковского шору, а роботи досц условени и з хвилю. Окончує их подприємство „Слован-прогрес” д.о.о. зоз Селенчи, а поштредує и надпатра подприємство „Изґлед” з Руского Керестура.

ПОВЯЗАНИ ТЕКСТИ