СРИМСКА МИТРОВИЦА – У грекокатолїцкей церкви Вознесеня Господнього у Сримскей Митровици всоботу, 24. октобра, повинчана малженска пара Руснацох. Милицу Преґун и Бранимира Яношка повинчал сримскомитровицки парох о. Владислав Варґа, а понеже Руснаци у Митровици уж барз помишани з другима народами, то була значна и нєкаждодньова подїя за нашу заєднїцу, яка давно нє була у тим сримским городзе.
Шветочносц ступаня до малженста рускей пари возвеличала и Шпивацка група Руснацох, хтора одшпивала многолїтствиє и вецей руски свадзебни шпиванки, а понеже велїм госцом у преполней церкви то було перше стретнуце з нашим традицйним винчаньом и пригоднима шпиванками, о нїх бешедовал о. Варґа.
Руснаци у Сримскей Митровици ше пририхтую и за програму, хтора тей соботи, 31. октобра, будзе у Центре за културу „Сирмиумарт”.