РУСКИ КЕРЕСТУР – Драмски мемориял Петро Ризнич Дядя предлужени на найкрасши способ – зоз театралну роботню „Цо пожадам, тото можем буцˮ. Роботню отримала Адриана Надь Барна зоз сотруднїками.
Як визначела Барнова, на Мемориял ше нє приявела анї єдна представа за дзеци. Прето за наймладших же би нє остали очкодовани, до драмскей слички преточени резултат роботньох отриманих у септембру и октобру.
Проєкт театралних роботньох порушани на инициятиву Адриани Надь Барна, котра и автор тексту за тот „Театрални бон-тонˮ, у сотруднїцтве зоз Маю Зазуляк Гарди.
Барнова подзековала Дому култури Руски Керестур, Маї Зазуляк Гарди, Танї Арва Планчак и Заводу за културу войводянских Руснацох, котри помогли же би тота театрална роботня була отримана.
