НОВИ САД – У святочним салону Новосадского сайма, вчера, 14. мая, отримана конференция за новинарох з нагоди 93. Медзинародного польопривредного сайма, хтори будзе отримани од 16. по 21. май.
За єдним столом зишли ше представителє Министерства польопривреди, лєсарства и водопривреди, Амбасади Републики Ческей, компания Дунай осиґураня, Ал Дахри, и КИТЕ ДОО, Банки Поштанскей шпоровнї Нови Сад и представителє Новосадского сайму.
На конференциї бешедовали Слободан Цветкович, Желько Радошевич, Владимир Ваня, Юґослава Цветкович Стоянович, Никола Станич, Младен Савич и Предраґ Ачимович.
З ресорного министерства сообщене же на тогорочним сайму буду участвовац традицийни приятелє Сербиї медзи хторима Република Ческа як жем партнер, Зєдинєни Арапски Емирати и Република Сербска. Наявени и велї визначни госци, а предвидзене же буду отримани и билатерални схадзки министра польопривреди, лєсарства и водопривреди у Влади Републики Сербиї, проф, др Драґана Ґламочича зоз иножемнима делеґациями.
Министерство под час сайма будзе мац штанд на хторим буду представителє Управи за аґрарни плаценя и польопривредних совитодавних и фахових службох. Праве там польопривредни продукователє годни дознац вецей о помоци и потримовки ИПАРД програми, конкурсох и административней процедури.
Фахова програма будзе отримана у салох Мастер ценра, а фокус будзе праве на ИПАРД програми, диґитализациї и штучней интелиґенциї.
