БЕОҐРАД – Пондзелок, 16. децембра у Палати Сербия отримана Конференция о Медзиетнїчних одношеньох на локалним уровню у Републики Сербиї. На тей Конференциї участвовали и представнїки Националного совиту Руснацох (НСР), предсидатель Вивершного одбору НСР Славиша Сабадош и предсидателька Одбору за службене хаснованє язика и писма Блажена Хома Цветкович.
На Конференциї ше представело и бешедовало о резултатох анализи фунционалносци Совиту за медзинационални одношеня хтори реализовал Совит Европи, презентовало ше и замеркованя и заключеня зоз отриманих тренинґох вязаних за Совити за медзинационални одношеня, як и о тим як мож посцигнуц националну ровноправносц на локалним уровню и интеркултуралней пракси, зоз преглядом потерашнєй и актуалней пракси, дознали зме од предсидательки Одбору за службене хаснованє язика и писма Хома Цветкович. О Совитох за интеґрацию у Нємецкей и конкретней пракси у їх дїлованю, як и о политичним участвованю през правне утвердзованє и прилапйованє бешедовал представнїк зоз Нємецкей адвокат и правни совитнїк Клаус-Армин Киршнер.
На концу трецей сесиї, после винєшених даскелїх прикладох представнїкох даєдних националних совитох (НС), о тим же як функционує їх Совит за медзинационални одношеня, бешедовало ше о мултиетнїчних одношеньох на локалним уровню, односно о перспективох меншинох и питаньох практичного применьованя.
На концу у дискусиї заключене же Совит за медзинационални одношеня (СМО) ище вше нє ма кажди НС, а и кед постоя нєдосц су видлїви, велї з нїх пасивни и анї нє маю ясно дефиновани свойо цилї и задатки, окрем кед треба дац думанє о менох улїцох, площох и подобне, а представнїки локалних самоуправох и попри тим же су отворени за сотруднїцтво зоз СМО нє видза их як приоритет, алє як институцийну терху.
Конференцию орґанизовал Европски центер за меншински питаня.
