Колектив „Руского слова“ випровадзел Меланию Римар до пензиї

автор б. варґа, фото в. вуячич
841 Опатрене

НОВИ САД – Синдикат и колектив НВУ „Руске слово“ вчера випровадзел до пензиї длугорочну одвичательну редакторку Часописа за дзеци „Заградка“ Меланию Римар.
Римарова у „Руским слове“ занята од 1984. року, а о два роки преходзи до „Пионирскей заградки“. Од початку дзеведзешатих була редакторка, а од дватисячитого и одвичательна редакторка часописа за дзеци. Медзитим, ґенерациї ю познаю як єдну з найважнєших авторкох писньочкох и приповедкох за дзеци.
Писац за дзеци Римарова почала кед почала робиц у часопису Пионирска заградка, а першу збирку писньох за дзеци Лєто у дїда обявела 1987. року. Потим шлїдзели збирки Слунечков сон, Пошептала ми птица, Сказков заглавчок, Шнурка и ґужлїк, Чилаш, а без принца, Жвирки у азбуки, Гайзибан на шпарґу, Хто як сце и ище штири кнїжки по сербски.
Мелания Римар пририхтала збирку руских народних писньох за дзеци Когуцик ярабик и Антолоґию приповедкох за дзеци Драга до швета, як и двоязичну кнїжку (по руски и по сербски) познатих сербских поетох под насловом Чи ми верице – Да ли ми верујете.
Велї єй писнї компоновани и виводзени на наших музичних фестивалох. Заступена є у Антолоґиї писньох за дзеци Хмара на верху тополї, у Букваре, Читанкох и у вецей антолоґийох на сербским, українским, македонским, русийским и румунским язику.
Колектив „Руского слова“ єй подаровал пригодни дарунок, а колеґове ше здогадли як одрастали на єй творох, обчекуюци же зоз Установу Римарова предлужи и надалєй добре сотрудзовац як Дюра Латяк, Ирина Гарди Ковачевич, Юлиян Пап и Михайло Симунович.
Часопис за дзеци „Заградка“ того року означує ювилей – 75-рочнїцу.

ПОВЯЗАНИ ТЕКСТИ