По нєдзелю ше мож приявиц за участвованє на „Дньовки”

автор маз
938 Опатрене

РУСКИ КЕРЕСТУР – Ище нєшка и ютре ше мож приявиц за участвованє на главней програми 18. Мултимедиялней манифестациї младих „Дньовка”, док конкурс за фотоґрафиї, з тему „Контраст”, за виставу на „Дньовки” тирва по 10. новембер.

За участвованє на главней програми, хтора будзе 21. новембра, можу ше приявиц млади до 33 роки зоз шицких местох, котри ше на „Дньовки” сцу представиц зоз шпиваньом, граньом, танцом, лєбо интерпретацию поезиї и прози.

Заинтересовани учашнїки треба же би послали поруку на „Дньовков” Фейсбук бок, лєбо на е-адресу dnjovka.rk@gmail.com.

На исту е-адресу треба послац и авторски фотоґрафиї за Конкурс и особни податки (мено, презвиско и место пребуваня), а єдна особа може послац найвецей пейц фотоґрафиї. Вибрани 25 фотоґрафиї буду виробени и виложени у голу Дому култури под час „Дньовки”, а три найлєпши и наградзени.
Тогорочна „Дньовка” почнє на пияток, 20. новембра, з промоцию нєдавно обявеного музичного албуму Златка Русковския „Лєм єден погляд” (МАК 9-10/15), а його композициї, як и на албуму, буду шпивац Саня Полдруги, Танита Ходак и Анамария Колошняї.

По промоциї будзе означена и 10-рочнїца емисиї „Останьце нашмеяни” Радио Нового Саду, хтору водза Саня Маркович и Саня Полдруги, познатши як „Два Санї”.

Уж традицийно, „Дньовку” орґанизую млади зоз „Пакту Рутенорум”, тераз у рамикох „Костельниковей єшенї”.

ПОВЯЗАНИ ТЕКСТИ