НОВИ САД – Розвойни фонд Войводини початком того тижня розписал конкурси за вигодне кредитованє поднїмательох и привреднїкох, як и за кредитованє у польопривреди, дзе и за реґистровани польопривредни ґаздовства.
За длугорочни кредити за инвестицийни укладаня поднїмательох вєдно опредзелєни 600 милиони динари, а у складзе з кредитнима способносцами подношительох вимогох, мож конкуровац за доставанє од 500 000 до 20 милиони динари, под вигоднєйшима условиями.
Поднїмателє можу конкуровц и за длугорочни кредити за тирваци обрацаюци средства, тиж за доставанє од 500 000 до 20 милиони динари, а за краткорочни кредити за обрацаюци средства од 300 000 до 20 милиони динари.
За длугорочни кредити у польопривреди наменєни 400 милиони динари (за скоро шицки обласци у польопривреди, як и за купованє механїзациї), дзе реґистровани польопривредни ґаздовства можу конкуровац за доставанє кредиту од 300 000 до 10 милиони динари, а таки виноси мож достац и як длугорочни кредит за купованє польопривредней жеми.
Польопривреднїки можу конкуровац и за вигоднєйши краткорочни кредит за обрацаюци средства, и то за виноси од 300 000 до 5 милиони динари.
Шицки информациї о конкурсох и потребну документацию мож найсц на сайту www.rfapv.rs.