РУСКИ КЕРЕСТУР/КУЛА – Коцерт школярох Школи за основне музичне образованє (ШОМО) з Кули з нагоди законченя школского рока вчера отримани и у Руским Керестуре, у Велькей сали Дому култури. Виведзени 28 точки школярох-солистох, цо лєм єдна часц школярох рускокерестурского Оддзелєня ШОМО.
На початку наступел хор керестурского Оддзелєня з двома шпиванками, а потим директорка Школи Лїляна Барна Никитович публики представела значни тогорочни успихи школярох ШОМО на рижних змаганьох, дзе вєдно освоєли 22 награди.
Окреме визначела успишну роботу цалого Оддзелєня у Руским Керестуре и представела школярох и їх наставнїкох котри були найуспишнєйши и наградзовани на змаганьох – Олесю Папуґа, Иґора Папуґу, Виктора Хрина, Матея Катрину, Михайла Рацпетия и Ивану Планчак.
Спомнути наступели и на Концерту найуспишнєйших школярох Школи, хтори 1. юния отримани у Кули, дзе од Школи достали и пригодни награди.
Як визначела директорка Барна Никитович, од Културно-историйного центру з Краґуєвцу Школа того року достала и припознанє „Давидова гарфа”, за тирваце доприношенє и успишну творчосц у музичней уметносци.