Орґанизована нащива оглядного поля у Чизмарових

автор мар
1.1k Опатрене

РУСКИ КЕРЕСТУР – Нєшка бул орґанизовани одход на оглядне польо до Чизмарових, котри маю засадзено гибридну червену рогову паприґу „Каптур” компаниї „Аґроарм”, а у сотруднїцтве зоз „Тимак Аґро Балканс” и „Белхим Кроп Протекшн”.

Чизмарово маю посадзену половку парцели з гибридом „Каптур”, а другу половку з нашеньом сорти, пилираного, найвисшого квалитету нашеня „Слонового уха” семенскей хижи „Супериор” з Велькей Плани котру домашнї садза самоинициятивно, алє зоз цалком истим приступом и третманом. Та могло опатриц и розлики у потенциялох нашеня.

Виход на оглядне польо бул орґанизовани скорей планованого на „Дньох керестурскей паприґи”, пре пошвидшане зренє, та и запланованей оберачки спомнутого гибриду, котра почнє од штвартку, 10. авґуста. Медзитим, як плановане, виход, презентация и совитованє будзе отримане ище раз и на спомнутей манифестациї.

08.08.2017.-Pestika-ohljadne poljo 011

Фаховец з „Аґроарму” Ранко Нєґован привитал шицких госцох, подзековал домашнїм на успишним сотруднїцтве, та представел пейц пробни гибриди – Ариадни Ф1, Каприма Ф1, Тон Тон Ф1, 102 ПП Ф1, и єден гибрид билей бабури чийо нашенє у розвою, на малей поверхносци, а потим и вельку поверхносц з гибридом „Каптур”.

 – Як и сами видзице паприґа красна, правда пре таки температури муша буц и пошлїдки – нєдостаток калциюму и опечена є од слунка, алє патраци обєктивно „Каптур” задоволєл обчекованя продукциї на отвореним полю. Потенциял того гибриду на отвореним до три килограми по копиню, у завартим мож обчековац и до седем. Прешлорочни урожай бул 1 450 ґрами по рошлїни, а того року шмело обчекуєме коло два кили, даґдзе и три. Же гибридни нашеня будучносц то вам потвердзи и тота паприґа обок, „Слоново ухо”, котра обачлїво захорена, а достала шицко цо и наша гибридна – гварел Нєґован.

Же Чизмарово задовольни зоз свою паприґу, то потвердзує и нагадованє чи можебуц нарок нє посадзиц цалу парцелу з гибридом.

– Укладанє до здравого нашеня гибриду, котре нє ноши на себе рижни хороти нїяк нє може буц вельке, алє дефинитивно прави вибор. Паприґа коло паприґи, та гибридна остала цалком здрава, док сорта „Слоново ухо” попри истого третману охорела – гварела власнїца парцели Наташа Чизмар.

08.08.2017.-Pestika-ohljadne poljo 009

ПОВЯЗАНИ ТЕКСТИ