НОВИ САД – Вчера, 8. марца, на Медзинародним саяме кнїжкох у Новим Садзе, зоз своїма виданями ширшей явносци представела ше Новинско-видавательна установа „Руске слово” и Завод за културу войводянских Руснацох у гали „Мастер” на Новосадским сайму.
На покраїнским штанду директорка НВУ „Руске слово” Мартица Тамаш дала уводне слово, а домашнї промоциї, Микола Шанта, одвичательни редактор Видавательней дїялносци, привитал госцох-писательох чийо кнїжки вчера були представени – Дюру Латяка, автора кнїжки „Руснаци”, академика Юлина Тамаша и його дїло „Складанє идентитетох”. Представени и роман фантастики за младих „Инисур – рика княза” Себастияна Нярадия, кнїжка поезиї „Дармоєди” Саши Сабадоша и кнїжка руских народних писньох за дзеци „Когуцик ярабик” котру за видаванє пририхтала Мелания Римар.
На тим штанду Завод за културу войводянских Руснацох представел Моноґрафию „Руснаци у Суботици“, Зборнїк роботох зоз науковей конференциї отриманей 2016. року, мастер роботу „Литературно-историйни дискурс драмского додатку часописа ’Шветлосц’ у периодзе од 1952. року по 2010. рок” хтора видата у Едициї иновацийох „Ґарянски” и найновше виданє – Словнїк руского народного язика. О тих виданьох кратко бешедовали Анамария Ранкович, о. д. директора Заводу, як и авторе проф. др Юлиян Рамач, Александра Лендєр и Сашо Сабадош.
