„Руске словечко” – куцик за дзеци

автор Борис ВАРҐА
8.1k Опатрене

 

Од того числа новини „Руске слово” уводза нову рубрику – боки за дзеци „Руске словечко”. Тоту рубрику ше уж длугши час пририхтує, а почесне редакторство першого додатку подписує редакторка „Заградки”, Мелания Римар. Роботна назва тей рубрики була „Заградка у Руским” и идея була же би боки за дзеци вишли як часц окремней концепциї новинох, под час лєтнєй шеми.

Медзитим, колеґове ше зложели же бизме рубрику нє вязали за „Заградку”, же би ю ушорйовли вецей редакторе и же би вона стаємно, голєм раз мешачно, виходзела и после лєтнєй шеми. Таки условия ше здобули аж од априла того року, кед „Руске слово” почло виходзиц на 40 бокох.

З часом, „Руске слово” би требало мац 52 боки, як цо ма словацки тижньовнїк „Глас люду”, а „Руске словечко” би вец могло виходзиц у каждим, або у каждим другим чишлє.

Так попри литератури, младих и дзеци достали свой окремни „куцик” у новинох „Руске слово”, та гоч за тоти обласци знука Установи исную окремни специялизовани виданя.

Будземе ше намагац же би наймладши нашо читаче сцели вжац новину до рукох и читац, виполньовац чи вифарбйовац свойо боки. Же би їх родичи, або баби и дїдове, мали вецей причини предплациц ше на наш найстарши медий.

Зоз уводзеньом тей рубрики, помали ше закончує системска реформа новинох „Руске слово”, котру сом запровадзовал як часц редакторского мандату од 2013. року.

Кажда пременка то ошвиженє, нови моци и змаганє. Кед ше нїч нє меня, нє лєм у Установи, алє и у живоце, то резултира зоз завераньом, вичерпаносцу идейох и препаданьом. Култура ше претваря до политики.

Тото цо нам найменєй тераз треба у новинох „Руске слово” то – политика.

Гоч „Руске словечко” на наших тварох виволує дзецински ошмих, то нє значи же ше треба опущиц. Новином „Руске слово” и Установи потребни ище велї професийни трансформациї, озбильне новинарске закасованє рукавох и вельо труду же бизме могли повесц же зме вошли до 21. вику.

Пишце нам – ruske.redaktor@gmail.com.

ПОВЯЗАНИ ТЕКСТИ