Уж даскельо роки на змаганьох зоз сербского язика, як нємацеринского, нашо дзеци, Руснаци освоюю перши места. Други национални заєднїци заоставаю за нами… анї по костки.
На нєдавно отриманим Републичним змаганю зоз сербского як нємацеринского язика зоз Банату, Бачкей и Сриму, Руснаци прешли барз добре: у конкуренциї седмих и осмих класох освоєли перши места. Нє подло прешли анї други 15 школяре, кельо участвовали, забераюци високи други и треци места.
Гоч сербски и руски славянски язики, та и вше подобнєйши, велї термини ше преплєтаю, а розлики треба замерковац, буц добре подковани, и розлучиц их. Знаю буц и причина за нєпорозуменє. Поведзме „право” – чи на право, чи просто? Углавним, анї криста-крижом, анї напрейґа, алє може виволац катастрофу.
Нашо баби у скорейшим чаше ше знали повиплєтац по сербски, и часто служели за подшмих. Алє, тримали до свойого руского язика и нє дали го нїкому.
А, тераз, кед ше найду дзешец Руснаци и єден Серб, ми звичайно, як шорови и воспитани дзеци, бешедуєме по сербски. Та, и кед тоти исти розумя по руски.
Бул сом на даскелїх сходох, дзе присутни слабо розумели наш язик, алє вимагали же бизме бешедовали по руски, же би почувствовали мелодичносц, препознали пар слова и вирази котри у вецейнационалним штредку дзешка уж чули.
Руснаци вше лєпше бешедую по сербски. Донєдавна найлєпше стали Дюрдьовчанє, ровноправно ше им придружовли Коцурци, а, нє даю ше анї Керестурци. Кед так предлужиме, лєпше будземе бешедовац по сербски як по руски. Мацерински охабиме бабом.