И так, пред мешацом Трамп утаргнул економски санкциї Русиї и Ирану, тераз блокира Ормужски морйоуз, поволал Китай (котрому грожи зоз санкциями и тарифами), же би му помогнул…
Алє то нє шицко!
Весела Европска уния котра ше люби представиц як морална супериорна орґанизация на тим швеце, була стримана (стримана!!!) на гласаню у Зєдинєних нацийох же би ше трансатланска тарґовина зоз рабами преглашела за найстрашнєйше злодїйство процив чловечества, 25. марца 2026. року.
И то нє шицко! Русия, Билорусия, Турска и Сербия єдини держави зоз европского континету котри гласали за осудзованє страшного трансатланского злодїйства котре тирвало пейц вики.
Прето же ше шицко круци коло пенєжу. Морално супериорна Заходна Европа, у ствари, виновнїк трансатланскей тарґовини з рабами, ту настал расизем, капитализем и фашизем. Мушела би плациц репарациї бувшим колонийом котри ище вше дави, алє тераз зоз свою „мегку моцу”, гоч, правда же исную дзепоєдни европски воєни єдинки у африцких державох – ище вше. Держави Восточней Европи тераз єй нови колониї (прето скоро цали континент бул стримани), а вельки сили – Русия и Турска, нє участвовали у трансатланскей тарґовини. Зоз рабством ше занїмали на иншаки способ. Анї Сербия нє, и тото гласанє менєй, або вецей, єдина шветла точка у историї Сербиї у 21. вику.
Значи, анї актуални политичаре зоз Шпаниї, котри медзи першима осудзели Трампа, осудзели ґеноцид Ираїлу над Палестинцами, припознали Палестину, поцагли свойого амбасадора зоз Израїлу… Аж и вони були стримани. Бо – огромни пенєж, за огромни бувши колониї, цо векшина америцкого континенту. И най дополнїм – а осудзованє Израїлу и етнїчного чисценя, пожнї полни 79 роки, односно ґеноциду голєм 57 роки, кед социялистична Югославия, а потим и цали социялистични блок, претаргнул одношеня зоз Израїлом. Сербия нєшка уходзи до роботи продукциї дронох зоз Израїлом хтора ше виплаци.
Алє, то нє шицко! Пропаґандну войну достава Иран, теократска держава. По тим виходзи же теократия лєпше звладала смак широких трошительних масох на планети, и руку на шерцо, їх пропаґандна машинерия одлична.
Зменєни Виктор Орбан, а Петро Мадяр мегчейша правица, и то можебуц мегчейша.
Углавним, патриме як чече война, и политична, и воєна, медзи саму правицу, єй благшима, и єй екстремнєйшима часцами.
Либерали прелїґнути (углавним), а така згуснута, застрашуюца ситуация отвера драгу револуцийом. Наздаваме ше.