Конєчно после длугшей прерви, робиц почал и Одбор за образованє Националного совиту Руснацох котри творя седмеро, предсидателька Сенка Мученски, и члени Славица Чельовски, Зденко Лазор, Александра Йованов, Татяна Колесар, Андрея Чернок, и Мая Дюмич. Пред нїма озбильни задаток – зачувац образованє по руски, бориц ше за каждого руского оводарца, школяра, и студента, и руски оддзелєня, и остарац ше же би було учебнїки по руски. Тих дньох отримали першу схадзку на живо у новим составе. Пред тим, робота Одбору за образованє була на „павзи” од лєта, подцагуюци смужку, нє схадзковало ше длужей як рок.
Образованє на мацеринским язику у Коцуре и Дюрдьове ше находзи у историйней кризи, нєт хто уписац дзецко до першей класи до оддзелєня по руски. Роками уж ситуация алармантна, и грожи зоз гашеньом руских оддзелєньох, та аж и же би хтошка тим школом знял епитет „руска”. Простору за геверованє, и обчекованє же ше проблеми риша сами, нєт! Єст Руснацох, и єст руски дзеци, алє популарне же би ше руски дзеци образовали на сербским язику, а часто зоз руску учительку. Нє ирония, алє правда, и нє прето же су нєкомпетентни, алє прето же таки обставини.
У Дюрдьове того року до першей класи буду уписани 49-еро дзеци, у Коцуре зоз дзецинскей заградки до школи ше упише 41 школяр, у Руским Керестуре єст 48 будуци першокласнїки. Упис до першей класи тирва до конца мая, та теди будзе познате кельо будзе руски першокласнїки. На схадзки Одбору дознаваме же нє обчекую интересованє за першу класу по руски у Дюрдьове, а у Коцуре потераз за наставу на мацеринским руским ше опредзелєли лєм двойо, алє же ше Управа Школи будзе намагац прешвечиц родичох же би уписали свойо дзеци до руского оддзелєня. Контрадикторне на шицко тото, же у тих двох руских валалох, у руских културно-уметнїцких дружтвох єст полно дзеци, значне число дзецох у тих истих школох ше опредзелює за грекокатолїцку виронауку, а надосц дзеци єст и на першей причасци. Лєм нєт хто до школи по руски. Оправданя рижни, алє покус без озбильних арґументох. Одрастац и жиц у єдним мултикултуралним и мултинационалним штредку треба же би було богатство шицких нас, зоз котрим ше будземе пишиц, же бизме ше препознавали по наглашку хто одкаль, а нє же бизме чежели єдному униформному, пре котри занєдзбаме тото свойо.