Тройо Керестурци и Кулянєц представяли Заходнобачки округ на Републичним змаганю

автор маф
930 Опатрене

БЕОҐРАД/РУСКИ КЕРЕСТУР – На Републичним змаганю „Цо знаш о транспорту” за школярох основних школох, хторе у Беоґрадзе отримане 26. и 27. мая, Заходнобачки округ представяли штверо школяре з кулскей општини – Иван Рац, Леонела Цифрич и Уна Планчак з ОШ „Петро Кузмяк” з Руского Керестура и Констатнин Ничетин з ОШ „Иса Баїч” Кули. У конкуренциї 27 екипох, по поєдинєчних резултатох су у горнєй часци таблїчки, гварел за Рутенпрес наставнїк у ОШ „Петро Кузмяк” Зденко Шомодї.

Иван Рац и Леонела Цифрич ше змагали у старшей Ц катеґориї (школяре од 13 до 15 роки) и Рац у конкуренциї хлапцох завжал осме, а Леонела у конкуренциї дзивчатох  дзевяте место.

Уна Планчак и Констатнин Ничетин ше змагали у младшей Б катеґориї (школяре од 10-12 роки) и Уна у конкуренциї дзивчатох завжала двацете, а Константин у конкуренциї хлапцох 13. место.

Школярох з керестурскей Школи и у тогорочним циклусу змаганьох пририхтовал наставнїк технїчного и информатичного образованя Зденко Шомодї, котри гварел же є задовольни з посцигнутима резултатами, понеже Рац и Цифричова тераз прешли до висшей катеґориї, у хторей були наймладши у моцней конкуренциї, а Планчакова перша школярка у наймладшим возросту котра ше з керестурскей Школи пласовала на Републичне змаганє. Ничетина у ОШ „Иса Баїч” у Кули пририхтал наставнїк технїчного Михайло Шанта з Керестура.

ПОВЯЗАНИ ТЕКСТИ