Хронїка нашей души

автор о. михайло малацко
870 Опатрене

Кед ме з редакциї „Руского слова ” замодлєли же бим написал прилог за 25-рочнїцу Християнского часопису „Дзвони”, кущик сом ше застановел у дилеми – цо визначиц, цо описац, а же би нє було лєм повторйованє того цо уж познате. О самих початкох часопису „Дзвони” прекрашнє написал перши його редактор Михал Рамач у тогорочним Календаре. Надумал сом хронолоґийно описац збуваня у „Дзвонох” так як шицко цекло, алє исто так и як я тото дожил и видзел. Гоч рескирам же нє будзе шицко обєктивно поведзене, голєм єден критерий випочитуєм – щиросц.

Бул сом у Риме, учел других, а и сам сом предлужел студиї, теди кед ше сновало „Дзвони”. З радосцу сом приял вистку о виходзеню часопису, а влєце 1994. року и я ше приключел ґу тей екипи ентузиястох котри були ношитель, як ше укаже познєйше, того геройского проєкту. Екипа була досц числена: були ту священїки, новинаре, историчаре, адвокати… Паметам, велї „обични” людзе єдноставно зашли до редакциї котра була у дворе Новосадскей парохиї. Политична ситуация була така же велї „нєподобни” нашли голєм якиш притульок коло того часопису. Як то уж обичай у нас – „Дзвони” достали квалификацию опозицийних новинох, гоч по змисту анї найгорши нєприятель то нє могол доказац.

О. Роман Миз мнє довирел деликатну часц новинох, же би сом бул редактор „Богословскей думки”. Його план бул же би ше ту обявйовало тексти аванґарди самей теолоґиї, цошка цо шири єй гранїци. Мойо думанє було иншаке. О. Миз бул розчаровани, алє редактор Михал Рамач гварел: „Дали сце му най ушорює тоти боки, вецкаль го охабце най то роби.” Кущик з иронию, о. Миз додал  до наслову „Богословска думка” –  „теолоґия за каждого”. За мнє то бул комплимент а нє деґрадация, бо праве сом так и задумавал рубрику: пренєсц вирним безконєчни и вични правди на єдноставни и розумлїви способ. По моїм думаню, то найвекша мудросц.

На початку новини були парохиялни (виданє  Новосадскей парохиї) цо давало одредзену автономию, алє з другого боку, за нїма нє стало владичество, то єст владика. Кед потримовка донатора з Нємецкей престала, розчарованє о. Миза було очивисне. Вон бул за тото же би ше новини загашело. Шицки ми други були за то же треба предлужиц, гоч зме нє мали анї кущик сиґурносци же зме то годни финансийно поднєсц. О. Миз ше поцагнул зоз словами: „Кед сцеце – робце”. Новини одявени. Часопис „Дзвони” престал исновац. Зишли зме ше у францисканским манастире у Новим Садзе хтори мал видавнїцтво „Аґапе” и хтори нам друковал часопис. Паметам же патер Карло, кед видзел кельо нас єст (було нас 12-15) гварел нам – найважнєйше у таких часох очувац екипу.

У таким моменту у Дюрдьове зме ше зишли зоз преосвященим владиком Славомиром. Пошли зме шицки. Думам же аж и його тото число нєсподзивало, а видзи ше ми и престрашело. Покус зме му були представени як нєпослушни, та аж и як нєприятелє. Мушим припознац же сом нїґда нє почувстовал його нєприятельске становиско ґу часопису. Наша нєпослушносц була у тим же зме нє сцели зробиц два ствари за хтори зме чули же ше од нас обчекую: же треба оддалїц редактора Михала Рамача и же нє треба писац по українски до „Дзвонох”. Гоч новини були на уровню парохиї, ми думали же українски тексти уключую шицких наших вирних у владичеству. Цо ше дотика редактора Михала Рамача, мой одвит бул: „Без нього нє можеме”, цо була и правда иста. Тото же го хтошка преглашел за символ опозициї, ми нє могли анї зме нє сцели демантовац.

Векшина читачох нє зна же терашнї то нє тоти перши „Дзвони”. После гашеня перших, полни 5 мешаци о. Владислав Варґа як одвичательни редактор и я як главни редактор, обиходзели шицки державни институциї котри у медзичаше були премесцени до Беоґраду. Конєчно зме зоз датумом 01. 10. 1996. на Ришеню министерства за информациї достали повидменє же зме уписани до реґистра под числом 2245/96. Подписнїк – министер Александар Тиянич. О даскельо днї дал задзекованє. Таки часи були. Знова видаватель була єдна парохия, тераз у Руским Керестуре. Пре тедишнї политични причини, державни институциї з нашей церковней орґанизациї припознавали лєм парохиї. Нїяке владичество, викарият, деканат. Од теди ше вельо пременєло, алє видаватель и далєй парохия у Руским Керестуре, и далєй нє маме донаторох, и далєй зме вше у минусу, и далєй ше трудзиме же би часопис виходзел – и так уж 25 роки. Кед зме тото дотераз прежили, оздаль у будучносци будзе лєгчейше.

Политични обставини ше пременєли, а наш єдини стайомни донатор то державна установа. И гоч тоти средства нє покриваю анї штварцину потребох – вони, Слава Богу, стайомни и без нїх бизме нє могли. 

Кед „Дзвони” остали у длуствох и були пред гашеньом, знова, як и першираз зме зоз о. Варґом вжали часопис на свойо плєца – так по нєшка. Кед сом перши дзень крочел до Редакциї – стретнул сом вельки ентузиязем и єдинство и попри нєможлївих политичних и других обставинох.  Тот ентузиязем у цалим дружтве вецей нє постої. Ту нє помага нїч, та анї „Дзвони” нє помогню виправиц нєшкашньосц, поготов нашу. Алє праве прето часопис ище баржей потребни як нацагнута рука за тих цо глєдаю, цо ше нє придаваю и маю надїю. А чловек котри ма надїї, ма и сни, и сподзиваня, и радосц у будучносци.

„Дзвони” нє обични часопис. То нє вонкашня хронїка одредзених подїйох. Вон хронїка  нашей души, нашог о народу, а з другого боку и помоц за цошка цо вредне, драгоцине, цо надиходзи нас самих, та аж и саме нашо постоянє. Доґод маме потребу за таким часописом, дотля и ми постоїме як народ и Церква, бо зме нє лєм чупор, ґрупа, алє зме заєднїца котра ма нє лєм мено алє и свой смисел.

И попри своїх хибох и нєсовершеносцох, єдно сиґурне: будзем вше паметац анґажованє у „Дзвонох” як мою лєпшу часц котра ше нє вежнє одо мнє. Цитат зоз Евангелиї би бул лєм кущик иншаки.  Алє правда – иста.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ