ВИШНЇЧЕВО/МОРОВИЧ – На рики Босут всоботу, 9. авґуста отримана реґата на хторей числени учашнїки на ладьочкох рушели зоз Вишнїчева и плївали вкупно 11,4 километри по Камп у Моровичу.
Окрем учашнїкох аматерох, на реґати зоз окремним стартом участвовали и члени Каяк кану клуба „Филип Вишнїч“ зоз Вишнїчева.
У Моровичу отримани и гуманитарни базар, а як нам гварела орґанизаторка гуманитарней акциї Ивана Милош, од предатих рижних предметох и поживи назберане вкупно 138.480 динари за лїченє Уроша Йовича зоз Соту и Алексея Кнежевича зоз Вашици.
Успишни орґанизатор „Босутскей реґати“ було Здруженє „Дружтво под дудом“ зоз Моровичу.