8. ЯНУАР – Нєшка ше означує шветови дзень дурканя на писацих машинкох (World Typing Day)
1856 – Хирурґ, ґеодет и науковец др Џон Ален Вич пренашол боракс, натриюмову соль борней квашнїни, хтору ше нєшка хаснує у индустриї скла, козметики, медицини и у обисцу.
1940 – Народзел ше русински драматурґ, театрални режисер, педаґоґ Василь Турок-Гетеш (Габура, округ Медзилаборци, Словацка, 8. януар 1940 – Прешов, 7. новембер 2005). Стредню школу Василь Турок-Гетеш закончел у Братислави и предлужел студиї на Универзитету Коменского дзе дипломовал 1963. року. Преподавал словацки и русийски язик, филозофию и естетику у Українскей ґимназиї у Прешове. Познєйше преподавал и на Православним богословским факултету у Прешове. Од 1985. року робел як драматурґ у тедишнїм Українским народним театре, терашнї Театер Александра Духновича, у Прешове дзе ґу концу 80 рокох почал класц на репертоар театрални представи на русинским язику. Бул перши предсидатель Русинскей оброди, бул єден з главних сновательох и перши предсидатель ШК РРЛ, бул член Вивершного одбору Медзинародней орґанизациї Мезон де Пеї у Французкей, хтора репрезентує народи без власней держави. Василь Турок Гетеш умар 7. новембра 2005. року у Прeшове.
2011 – Шветови дзень дурканя на писацих машинкох (World Typing Day), означує ше 8. януара. Зоз тим дньом ше означує писана форма комуникациї зоз хтору ше обезпечує швидкосц, точносц и ефикасносц. То тиж и дзень дактилоґрафох. Шветови дзень писаня на машинкох почало ше означовац 2011. року кед як здогадованє на змаганє у швидким дурканю на писацих машинкох хторе отримане у Малезиї. Сущносц означованя того дня же би ше спонукло людзох же би на таки способ комуниковали.
Нєшка ше означує Дзень ротациї Жеми як здогадованє на физичара Леона Фукоа хтори 1851. року явно демонстровал же ше Жем обраца коло своєй оси.
