ЖАБЕЛЬ – Гражданє Општини Жабель котри процив будованя комплексу за рециклажу пнеуматикох у жабельским хотаре, внєдзелю, 19. априла на площи, опрез будинку Општини Жабель орґанизовали еколоґийни сход „Нє даме Жабель! Нє даме Єґричку!֨”.
Сход бул пре информованє явносци о можлївим заґадзованю еколоґийней системи, окреме воздуху и поджемних водох, а пре будованє комплексу за рециклажу пнеуматикох, на локациї 7499/4 КО Жабель, чия процедура виробку проєктох и збераня потребней документациї у виробку.
На сходзе, спред гражданох општини присутних привитала Єлена Малешевич зоз Жаблю, а потим на бини арґуметовано, з прикладами зоз власного искуства и у своїм фаху бешедовал лїкар, специялиста патолоґ и бувши директор Пастерового заводу у Новим Садзе Душан Лалошевич, вец директор Еколоґийного руху Нового Саду Никола Алексич и дипломовани правнїк, предсидатель Еколоґийного руху Сербиї и Еколоґийного руху Нового Саду Остоя Дражич.
Правнїк Дражич присутним пояшнєл контрадикторносци у студиї о еколоґийним уплїву будованя комплексу за рециклажу пнеуматикох, котри ше ма усвоїц на Скупштини општини Жабель як часц документациї котра потребна за вибудов комплексу. Вон начишлєл вецей контрадикторносци, та так у єдней часци документа пише же у блїзкосци нєт защицени прородни ресурси, а єст парк природи Єґричка котри под защиту держави, та и же у блїкосци нєт школи и амбуланти, а єст и предшколска установа, основна и штредня школа, алє и Дом здравя. Таки контрадикторносци було вецей, та правнїк Дражич совитовал же треба бранїц свой животн штредок.
Здогаднїме же стреду, 15. априла отримана явна презентация урбанистичного проєкту урбанистично-архитектонского розробку локациї 7499/4 КО Жабель за потреби реконструкциї иснуюцого обєкту зоз надбудову, адаптацию и пренамену комплексу за рециклажу пнеуматикох. На Явней презентациї гражданє ше найвецей випитовали о защити еколоґийней системи, яки мири коло того превжати, алє и чи єст параметри же би ше годно познєйше поровнац, та и доказац чи и як вплївую на еколоґийну систему.
Тирва петиция котру порушали гражаданє општини, и котру мож опатриц на тим ЛИНКУ.
