11. ФЕБРУАР – На нєшкайши дзень народзени учитель Евґений Медєши.
1847 – Народзени америцки физичар, пренаходзач Томас Алва Едисон (Майлан, Очайо, ЗАД, 11. фебруар 1847 – Вест Ориндж, 18. октобер 1931), хтори реґистровал вецей як тисяч патенти, уключуюци грушку зоз угльову нїтку, фоноґраф, микрофон, меґафон, фонометер. Усовершел и телеґраф и акумулатор и значно злєпшал динамо машину, пренашол кинетоскоп и перши применєл целулоидну филмску пантлїку од 35 милиметри. Направел перши филмски ателє.
1923 – Народзени Евґений Медєши (Руски Керестур, 11. фебруар 1923 – Руски Керестур, 29. новембер 2008), учитель, спортски роботнїк, ґлумец и режисер-аматер. Основну школу закончел у своїм валалє, нїзшу ґимназию з малу матуру Йовґен Медєши закончел у Вараждинє, три класи висшей ґимназиї у Заґребе и штварту класу ґимназиї з вельку матуру закончел у Ужгородзе. Робел як учитель у основней школи у Керестуре, бул и управитель школи, а робел и у тедишнєй нїзшей ґимназиї. Учитель Йовґен Медєши робел на прекладаню учебнїкох зоз сербского на руски язик, бул рецензент учебнїкох и автор читанки на руским язику за другу класу. Бул єден з найлєпших фодбалерох у Спортским клубе Русин у Руским Керестуре (у периодзе 1938–1956), а ґу тому бул и добри бавяч столного тенису. Режирац почал 1951. року зоз старшима ґлумцами, алє ше 1959. року опредзелєл лєм на театралну роботу зоз школскима дзецми. До пензиї пошол 1984. року. Йовґен Медєши умар у Руским Керестуре 29. новембра 2008. року, а поховани є 30. новембра на керестурским теметове.
1945 – У Ялти закончена конференция вождох трох силох антигитлеровскей коалициї, на хторей совєтски лидер Йосиф Сталїн, предсидатель ЗАД Френклин Рузвелт и британски премиєр Винстон Черчил порадзели воєни плани за законченє Другей шветовей войни и одредзели нови одношеня у Европи и у швеце после войни. Троме лидере усвоєли резолуцию о „шлєбодней Европи” и порадзели ше о снованю Зєдинєних нацийох як общей медзинародней орґанизациї за мир и безпечносц у швеце.
1929 – Латерански контракт зоз хторим Кральовина Италия и Святи престол подписали спорозуменє зоз хторим припознати суверенитет Городу Ватикану.
1990 – Лидер борби процив апартхейда Нелсон Мендела пущени зоз гарешту после 27 роки, зоз чим почали демократски пременки у Южней Африки.
Нєшка ше означує Медзинародни дзень женох и дзивкох у науки (International Day of Women and Girls in Science), хтори прилапени 22. децембра 2015. року на Ґенералней скупштини Зєдинєних нацийох (ЗН).
