КУЛА – У општини Кула, вовторок 24. фебруара, шветочно додзелєни 102 контракти за енерґетичну санацию обисцох, зоз чим предлужена реализация мирох злєпшаня енерґетичней ефикасносци у сотруднїцтве локалней самоуправи и Министерства рударства и енерґетики.
З тей нагоди општину Кула зоз Министерства рударства и енерґетики нащивели державни секретар Соня Влахович, помоцнїк министра за енерґетичну ефикасносц и климатични пременки Мая Вукадинович, як и директор Управи за финансованє и субвенционованє енерґетичней ефикасносци Милан Мацура, а привитал их предсидатель општини Кула Дамян Милянич.
Зоз вкупного числа додзелєних контрактох 52 ше одноша на чувствительни катеґориї гражданох, хтори можу достац 90 одсто средствох од держави, а 50 контракти додзелєни гражданом, хтори можу достац 50 по 65 одсто средствох. Циль субвенцийох же би гражданє зашпоровали на трошеню енерґиї и допринєсли очуваню животного штредку.