МИКЛОШЕВЦИ (ГОРВАТСКА) – Зоз Службу Божу у грекокатолїцклей церкви, вчера, 15. новембра, у Миклошевцох почало означованє велького ювилею того места – 165-рочнїци доселєня Руснацох до Миклошевцох. Предлужене є зоз Шветочну схадзку месних здруженьох, на хторей предсидатель Месного одбору Дюра Бики пречитал кратку историю места – од приселєня Руснацох до Миклошевцох, та по нєшкайши днї.
За ювилей пририхтана и кнїжка – фотомоноґрафия Дюру Лїкара „Миклошевци под сримским нєбом”, цо уж дзешатей кнїжки Дюру Лїкара о його валалє. Попри автора, о кнїжки бешедовал рецензент, миклошевцки парох о. Йоаким Симунович, док рецензия професорки на Филозофским факултету у Загребе др Оксани Тимко-Дїтко пречитана на промоциї кнїжки.
У фотомоноґрафиї приказани привредни, културни, образовни и вирски живот валалу, а интересантносц того виданя же у другей часци обявени фамилийни фотоґрафиї жительох Миклошевцох и основни податки о нїх, а при даєдних зазначени аж и седем ґенерациї.
У музичней часци програми з нагоди означованя 165-рочнїци доселєня Руснацох до Миклошевцох наступели Нада Батакович и Леся Мудри, Паула Поточки, Ивона Гнатко, хлопска шпивацка ґрупа з Петровцох и Иван Лїкар.
На шветочносци присуствовали визначни госци з Горватскей и зоз Сербиї, односно Войводини, медзи нїма и жупан Вуковарско-сримскей жупаниї Божо Ґалич, народна посланїца у Скупштини Сербиї Олена Папуґа, член Совиту за Национални меншини Републики Горватскей Звонко Костелник, заменїк предсидателя Националного совиту Руснацох (НС) у Сербиї Йовґен Мудри и предсидатель Вивершного одбору НС Желько Ковач, предсидателька Союзу Русинох Горватскей Дубравка Рушлянин, заменїк предсидателя Општини Томповци Звонко Звонарич, як и представителє културно-уметнїцких дружтвох и других здруженьох Руснацох у Горватскей.
По шветочносци и промоциї кнїжки, у виронаучней сали у церкви отворена вистава старих фотоґрафийох и ручних роботох наших старих – облєчиво яке ношели и алат з хторим робели. Виставу пририхтали членїци Активу женох.
Покровитель означованя 165-рочнїци доселєня Руснацох до Миклошевцох бул жупан Вуковарско-сримскей жупаниї Божо Ґалич, а програму орґанизовал окремни Орґанизацийни одбoр.
