РУСКИ КЕРЕСТУР – Того тижня, на пияток, 15. априла, у Руским Керестуре почина тогорочни 48. Драмски мемориял Петра Ризнича Дядї, а тирва по 23. април.
На смотри театралней творчосци Руснацох у Сербиї участвую єденац представи – седем за старших и штири дзецински, а Мемориял на пияток почнє з отвераньом вистави диґиталних роботох младей уметнїци Кристини Ґшвенґ з Вербасу.
Театралну часц на пияток отвори представа „Вона нєвиновата” Руского народного театру (РНТ) „Петро Ризнич Дядя”, а попри двох РНТ, з представами за старших на Мемориялє участвую и Драмски студи АРТ керестурского Дому култури, Заводу за културу войводянских Руснацох з мултиязичну представу, Културни центер Кула (по сербски), КУД „Яким Гарди” з Петровцох и РКЦ Нови Сад.
З представами за дзеци участвую КПД „ДОК” з Коцура, КУД „Тарас Шевченко” з Дюрдьова, Руске КУД „Др Гавриїл Костельник” з Кули и Драмски студио АРТ Дому култури Руски Керестур. Представи за дзеци на Мемориялє буду од пондзелку, 18., та по штварток, 21. априла.
Як и прешлого року, дзецински представи орґанизовано буду патриц и школяре з наших местох дзе маме порядну, лєбо виборну наставу по руски, а їх приход орґанизує Одбор за образованє Националного совиту Руснацох.
Шицки представи буду у Велькей сали Дому култури – дзецински починаю на 13, а за старших на 20 годзин.