Предсидатель Сербиї предложел же би ше почало широки дружтвени диялоґ о Косове. Предкладанє досц чудне, бо анї предсидатель, анї його партия нє познати по тим же их интересує люцке думанє. Цо вецей, вше даваю до знаня же ма буц и будзе так як вони надумали и же можу надгласац каждого цо ше нє склада з нїма, гоч би мал нє знам яке розумне и хасновите предкладанє.
Одкадз така нагла пременка? Вироятно з иножемства. Европа и Америка вимагаю од Беоґраду же би уж раз розчисцел з Косовом та Александар Вучич, перши раз одкеди є на власци, надумал бешедовац и з тима на котрих потераз анї нє патрел. Будзе же би сцел преруциц на политичних процивнїкох, алє и на цале дружтво, часц одвичательносци за одлуки котри його влада принєше. Кед у такволаним диялоґу будзе участвовац и опозиция, и Церква, и писателє и здруженя голубкарох, и Додик, вец предсидатель и його партия годни умиц руки: поробя по розказу иножемних старательох, а поведза же робя по дзеки народу.
Лєгко поволовац на диялоґ кед ше зна же диялоґу нє будзе. Од тих цо прилапя його поволанку Вучич учує тото цо жада: же Сербия нїґда нє припозна нєзависносц Косова и же анї векшина опозицийних партийох нє пристава же би Албанци були ровноправни гражданє Сербиї. З другима словами, векшина гражданох Сербиї сце Косово, алє нє сце векшину його жительох, Албанцох. Як и у Милошевичовим чаше, Беоґрад би сцел мац Косово у составе Сербиї – алє под условийом же покраїна нє будзе мац анї автономию, анї своїх шлєбодно вибраних представнїкох у републичних орґанох власци.
Пре таку политику Беоґраду, Косово и пошло по своєй драги. Гоч цо би нєшка Сербия понукла Албанцом, одвит би бул вше исти. На концу конца, вони тото цо сцели достали з Кумановским спорозуменьом 1999. и Бриселским 2013. року. Правда, тото цо маю далєко од того цо жадали. Маю себичних и нєморалних политичарох, корупцию на каждим крочаю, здравство и школство медзи найгоршима на континенту. Алє, и попри того нє сцу чуц за Сербию, односно за заєднїцки живот зоз Сербами. Кед би предсидатель Косова поволал партиї и явносц на диялоґ, чул би тото исте цо Вучич учує од своїх собешеднїкох.
Беоґрад и Приштина ше о дачим зложа лєм кед их на тото примуша у Бриселу. Анї єден бок нє пририхтани за диялоґ и компромиси. Цо ше дотика диялоґу зоз своїма – Сербох зоз Сербами и Албанцох з Албанцами – и єдни и други го прилапюю лєм кед их нїч нє кошта. Так будзе и з диялоґом на котри Сербох поволал предсидатель Сербиї.