20. АПРИЛ – На нєшкайши дзень селекторка на месних и општински рецитаторски смотрох у општини Кула Слободанка Настасич.
1841 – У филаделфийских новинох Ґрахамс маґазин (Graham’s Magazine) обявена приповедка Едґара Алана Поа Забойства у улїци Морґ, котра ше трима за першу детективску приповедку.
1893 – Народзел ше каталонски маляр и скулптор Хуан Миро (Барселона, Шпания, 20. април 1893 – Палма де Майорка, Шпания, 25. децембер 1983), єден з найвекших надреалистичних уметнїкох.
1949 – Народзела ше наставнїца сербского язика и литератури и длугорочна културна роботнїца, селекторка на месних и општински рецитаторски смотрох у општини Кула Слободанка Настасич (Деспотово, 20. април 1949 – Кула, 17. новембер 2024). Учительску школу закончел у Зомборе, а на Филозофским факултету у Новим Садзе здобула диплому професора югославянскей литератури. Занята була у Ґимназиї Петро Кузмяк у Руским Керестуре, дзе участвовала и у витворйованю културних активносцох у школи. Активно сотрудзовала зоз Домом култури у Руским Керестуре, з Руским народним театром Петро Ризнич Дядя, Културним центром Кула и зоз Култруно-просвитну заєднїцу општини Кула. Єден период препровадзела на роботним месце совитнїка у Министерству просвити и спорта у школскей управи Зомбор, а вец ше врацела до ОШ Петро Кузмяк як професорка сербского язика, одкаль пошла до пензиї. Слободанка Настасич похована 19. новембра на Новим теметове у Кули.
1972 – Америцка вселенска ладя Аполо 16 спущела ше на Мешац.
2003 – Китайске министерство здравя сообщело же ше од атипичного запалєня плюцох и Пекинґу похорели 339 особи, зоз котрих 18 умарли, зоз чим китайски власци перши раз урядово припознали розмири епидемиї САРС-а у главним городзе. САРС того року потрафел 20 жеми, а найвецей инфицираних реґистроване у Китаю и Гонґ Конґу.
Медзинародни дзень защити од галайку.
Нєшка Зєдинєни нациї означую Дзень китайского язика. Трима ше же китайски язик єден з найстарших язикох на швеце, од 1946. року постал официйни язик Зєдинєних нацийох, а од 1973. року є єден з шейсцох роботних язикох тей орґанизациї.